Çin süni intellekt modeli OpenAI-in təsadüfən törətdiyi haker hücumunun qarşısını almağa kömək edib

Çinin GLM 5.2 süni intellekt modeli "Hugging Face" platformasına OpenAI-in daxili sınaqlar zamanı özbaşına həyata keçirdiyi görünməmiş kiberhücumu araşdırmağa kömək edib. Bu hadisə Çin modellərinin Amerika şirkətləri üçün ən böyük təhlükə yaratması barədə geniş yayılmış fikri şübhə altına alır. Oxuməni.az xəbər verir ki, bu barədə "MarketWatch" məlumat yayıb.

Daxili təhlükəsizlik sınaqları zamanı OpenAI-in avtonom süni intellekt agenti izolyasiya edilmiş sınaq mühitindən çıxmağı, internetə daxil olmağı və süni intellekt modellərinin dərc edilməsi və yayılmasındakı roluna görə "süni intellekt üçün GitHub" adlandırılan "Hugging Face" platformasına hücum etməyi bacarıb. OpenAI baş verənləri görünməmiş kiberinsident adlandırıb.

Hücumdan sonra "Hugging Face" əvvəlcə hadisə jurnallarını qabaqcıl kommersiya süni intellekt modellərinin köməyi ilə təhlil etməyə çalışıb. Lakin şirkətin izah etdiyi kimi, bu mümkün olmayıb: araşdırma üçün real hücum əmrlərini, eksploytları və insidentin digər artefaktlarını yükləmək lazım idi, lakin kommersiya xidmətlərinin müdafiə mexanizmləri informasiya təhlükəsizliyi mütəxəssislərini cinayətkarlardan ayıra bilməyərək bu cür sorğuları bloklayıb.

Nəticədə, "Hugging Face" Çinin " Z.AI " şirkəti tərəfindən hazırlanmış və öz infrastrukturunda yerləşdirilmiş açıq kodlu GLM 5.2 modelindən istifadə edib. Bu, konfidensial məlumatları üçüncü tərəf süni intellekt təchizatçılarına ötürmədən hücumun tam təhlilini aparmağa imkan verib.

"MarketWatch" hesab edir ki, insidentin siyasi nəticələri ola bilər. Donald Trampın administrasiyasında Çin süni intellekt modellərinin istifadəsinə mümkün məhdudiyyətlərin müzakirə edildiyi bir vaxtda, ABŞ-ın maliyyə naziri Skott Bessent Amerika şirkətlərinin bu modellərdən istifadə etməsini oğurlanmış malların alınması ilə müqayisə edib. Lakin məhz Çinin açıq kodlu modeli hücumu operativ şəkildə araşdırmağa imkan verən yeganə alət olub.

"Hugging Face"-in həmtəsisçisi Tomas Volf "X" platformasında bildirib ki, qabaqcıl süni intellekt modeli şirkətin infrastrukturuna özbaşına hücum etdikdə, kibertəhlükəsizlik mütəxəssislərinə qapalı kommersiya modellərindən istifadə üçün icazə gözləmək deyil, dərhal eyni dərəcədə güclü müdafiə alətlərinə çıxış lazımdır.

MarketWatch-ın məlumatına görə, vəziyyət bir daha Çinli tərtibatçıların süni intellekt sahəsində amerikalı rəqibləri ilə fərqi nə qədər tez bağladıqlarını nümayiş etdirdi. Bununla belə, çip istehsalçılarına təsiri birmənalı deyil: daha ucuz Çin modelləri hesablama gücünə tələbatı stimullaşdıra bilər, eyni zamanda Çin aparat ekosisteminin mövqeyini gücləndirir.

Almaz Həsənli