Tramp İrana qarşı iqtisadi təzyiqləri gücləndirməyə meyllidir

ABŞ Prezidenti Donald Tramp İranda yeni hərbi əməliyyat əmri vermək əvəzinə, Tehrana qarşı iqtisadi təzyiqləri gücləndirməyə hazır olduğuna işarə edib. Oxuməni.az xəbər verir ki, bu barədə "Axios" nəşri Trampla keçirdiyi qısa telefon müsahibəsinə istinadən məlumat yayıb.

İslam Respublikası avqustun 8-də Hörmüz boğazından gəmiçiliyin bərpası üçün tələblər siyahısını açıqlayıb. Tramp isə öz növbəsində: "Biz buna o qədər də diqqət yetirmirik", - deyə bildirib.

Ağ Evin rəhbəri vurğulayıb: "Biz onlarla yalnız yarım güclə danışıqlar aparırıq. Biz sadəcə İranı, oradakı yüksək inflyasiyanı və onların pulunun olmaması faktını müşahidə edirik".

Trampın versiyasına görə, ABŞ-ın dəniz blokadası İran rejiminin iqtisadi böhranını daha da dərinləşdirib və onların hərbçilərə maaş vermək üçün vəsaitləri yoxdur.

Tehran avqustun 8-də Vaşinqtondan sanksiyaların ləğv edilməsini və ABŞ hərbçilərinin bu ilin iyununda imzalanmış anlaşma memorandumunu pozmasına görə təzminat ödənilməsini tələb edib.

"Tasnim" agentliyinin məlumatına görə, Ali Milli Təhlükəsizlik Şurasının rəhbəri Məhəmməd Baqir Zülqədər Ağ Evdən İranın bir daha ABŞ tərəfindən təhdid olunmayacağına dair zəmanət tələb edib. Digər şərtlər arasında ABŞ qoşunlarının regiondan çıxarılması, İran limanlarının dəniz blokadasının aradan qaldırılması, sanksiyalardan imtina, aktivlərin dondurulmasının açılması və İrana endirilən zərbələrə görə təzminat ödənilməsi yer alır.

Bundan əlavə, ölkənin ali rəhbəri Müctəba Xameneinin nəzarətində olan və ali qərar qəbul edən orqan sayılan İranın Ali Milli Təhlükəsizlik Şurası "Livan, Fələstin, Yəmən və İraqdakı müttəfiqlərinə qarşı təcavüzə" son qoyulmasını tələb edib.

Almaz Həsənli