Rusiya Ukrayna istehsalı olan dronlardan istifadə edərək NATO ölkələrinə hücum təşkil edə bilər

Rusiya ilə həmsərhəd olan NATO ölkələri Rusiyanın dronlarla təxribatına dair narahatlıqlar səbəbindən vacib infrastrukturun təhlükəsizliyini gücləndirir.

Bu barədə Oxuməni.az Reuters agentliyinə istinadən məlumat verib.

Narahatlıq odur ki, Moskva Ukrayna istehsalı olan dronlardan istifadə edərək yalançı hücum təşkil edə bilər. Belə bir halda, Rusiya Ukraynanı və ya NATO ölkələrini günahlandırmağa və hadisədən sonrakı hərəkətlər üçün bəhanə kimi istifadə etməyə cəhd edə bilər.

Litva artıq mayeləşdirilmiş təbii qaz və neft məhsulları terminallarını, Polşa ilə əsas elektrik xəttini və Kruonis nasos anbarı elektrik stansiyasını qorumaq üçün qoşunlar yerləşdirib. Latviya Riqa yaxınlığındakı Dauqava çayı bəndi və İnçukalns yeraltı qaz anbarı da daxil olmaqla, vacib infrastruktur obyektlərində təhlükəsizliyi gücləndirib.

Latviyanın Baş naziri Andris Kulberqs bildirib ki, potensial hibrid təhlükə ehtimalı indi əvvəlkindən daha yüksəkdir.

Polşada Orlen şirkəti təchizat kəsintiləri halında alternativ qaz idxal marşrutlarını nəzərdən keçirir. Qaz infrastrukturu operatoru Qaz-Sistem də yüksək səviyyədə sayıqlıq vəziyyətində fəaliyyət göstərir.

Baltikyanı ölkələrdən birinin kəşfiyyat rəsmisinin sözlərinə görə, Rusiya ordusu və xüsusi xidmət orqanları Ukrayna dronlarından istifadə edərək Rusiya, Baltikyanı ölkələr və Polşadakı infrastruktur obyektlərinə hücum planlaşdıra bilər.

Onun sözlərinə görə, belə bir əməliyyat Rusiya rəhbərliyindən təsdiq aldıqdan qısa müddət sonra həyata keçirilə bilər. Lakin əsas məqsəd infrastrukturun fiziki məhv edilməsi deyil, NATO daxilində siyasi böhranın yaradılması ola bilər.

Əziz Mustafa