Ablakva Rusiyanı Qana vətəndaşlarını qanunsuz olaraq Ukraynadakı döyüşlərə cəlb etməkdə ittiham edib

Xarici işlər naziri Samuel Okudzeto Ablakva Rusiyadan Ukraynaya qarşı müharibə üçün Qana vətəndaşlarını cəlb etməyi dayandırmasını tələb etdi. Moskva çağırışa cavab olaraq məsələnin həlli üzərində işləməyə razı oldu.

Oxuməni.az xəbər verir ki, bu barədə The Moscow Times nəşrinin yaydığı məlumatda deyilir. Məsələ ilə bağlı Rusiyaya səfər edən Qana xarici işlər naziri Samuel Okudzeto Ablakva Rusiya xarici işlər naziri Sergey Lavrovla görüşdə ona öz narazılığını bildirib. Qana rəsmisi həmçinin Ukraynada 62 Qana vətəndaşının öldürüldüyünü, daha 15 nəfərin isə itkin düşdüyünü bildirib.
Lavrov Qana vətəndaşlarının Rusiya Müdafiə Nazirliyi ilə müqavilələr imzaladığını açıq şəkildə təsdiqlədi, lakin iddia etdi ki, onlar bunu "irqçiliklə mübarizədə onlara kömək edən ölkə ilə həmrəylikdən" və "maddi və maliyyə səbəblərindən" ediblər. Bundan əlavə, Rusiya xarici işlər naziri Moskvanın digər ölkələrdən də oxşar sorğular aldığını bildirib.

"Müdafiə Nazirliyinin xüsusi bir orqanı var və mən əminəm ki, onlar Qanalı dostlarımızdan alınan əlavə sorğuları da nəzərdən keçirəcək", - deyə Lavrov bildirib.

Mediada qeyd olunur ki, cəbhədə Rusiya ordusuna qoşulmaq üçün Afrika vətəndaşlarının cəlb edilməsi regionda narahatlıq doğurur. Daha əvvəl Cənubi Afrika və Keniya hakimiyyəti Moskvaya eyni tələbləri irəli sürmüşdü. Təkcə fevral ayında kəşfiyyat Rusiyanın 1000-dən çox Keniya vətəndaşını aldadaraq Ukraynada döyüşməyə məcbur etdiyini bildirmişdi. Bir çoxlarına yük maşını sürücüsü və ya mühafizəçi kimi iş vəd edilmişdi.

Xatırladaq ki, iyul ayında Botsvananın Beynəlxalq Əlaqələr Nazirliyi Ukraynaya qarşı müharibədə Rusiya tərəfində döyüşməyə məcbur edilən və ya aldadılan vətəndaşların sayında sürətlə artım olduğunu bildirmişdi.

Həmçinin, Dezinfeksiyaya Qarşı Mübarizə Mərkəzinin açıqlamasına görə, 2025-ci ilin noyabr ayına olan məlumata görə, Rusiya Ukraynada döyüşmək üçün 128 ölkədən vətəndaş cəlb edib.

Əziz MUSTAFA