BMT Təhlükəsizlik Şurası Rusiyanın Ukraynaya qarşı müharibəsi ilə bağlı vəziyyəti müzakirə etmək üçün 24 avqust Bazar ertəsi günü - Ukraynanın Müstəqillik Günündə toplanacaq. Oxuməni.az xəbər verir ki, bu barədə Ukrinform-un məlumatında deyilir.

Bu məsələnin müzakirəsi Təhlükəsizlik Şurasının beş avropalı üzvü - Danimarka, Fransa, Yunanıstan, Latviya və Birləşmiş Krallıq tərəfindən irəli sürülüb. Danimarka xarici işlər naziri Lars Lokke Rasmussenin iclasda iştirakı gözlənilir, çünki ölkəsi avqust ayı ərzində Təhlükəsizlik Şurasına sədrlik edir. BMT adından iclasda Baş katibin siyasi və humanitar məsələlər üzrə müavini Rosemary DiCarlo və Tom Fletcher hesabat verəcəklər. Görüş Bakı vaxtı ilə saat 23.00-da başlayacaq.

Müharibəyə son qoymaq üçün yolların tapılmasında BMT-nin rolu son günlərdə bir neçə dəfə qaldırılıb. Bir gün əvvəl Prezident Vladimir Zelenski BMT-nin Ukraynada sülh axtarışına qoşulacağını elan etmiş və Rusiyanın hücumlarının digər ölkələr üçün də nəticələrə səbəb ola biləcəyini qeyd etmişdi.

Buraya ərzaq təhlükəsizliyi də daxildir - Rusiyanın Odessa limanlarına hücumları məhsul yığımının ortasında Ukrayna taxıl ixracını demək olar ki, dayandırıb və analitiklər bunun bu il Ukraynanın ÜDM-nin 2% azalmasına səbəb ola biləcəyini proqnozlaşdırırlar. İyulun sonlarında BMT Rusiyanın limanlara və gəmilərə hücumlarının dünya miqyasında ərzaq təhlükəsizliyini təhdid etdiyini etiraf etmişdi.
Əziz MUSTAFA