Bosniya serblərinin keçmiş ordu komandanı Ratko Mladiç vəfat edib
Bosniya serblərinin ordusunun Baş Qərargahının keçmiş komandanı, soyqırımda təqsirli bilinərək məhkum edilmiş Ratko Mladiç Haaqada BMT-nin həbs mərkəzində vəfat edib. Oxuməni.az xəbər verir ki, bu barədə Reuters Belqradda fəaliyyət göstərən Informer TV telekanalına istinadən məlumat yayıb. Serbiyanın RTS telekanalı da bu barədə məlumat verib.
84 yaşlı Mladiç ömürlük həbs cəzası çəkirdi. Aprel ayında onun vəkilləri səhhətinin pisləşməsini əsas gətirərək vaxtından əvvəl azadlığa buraxılması üçün vəsatət qaldırıblar. Mladiç iki il ərzində həbsxana xəstəxanasında müalicə olunub, yataq xəstəsi olub və ya əlil arabasından istifadə edib.
Serbiyanın ədliyyə naziri Nenad Vuyiç də Mladiçin azadlığa buraxılmasını istəyib.
Ratko Mladiçin müdafiəsi onun hospisə köçürülməsini xahiş edib.
Ratko Mladiç 1992-1995-ci illərdə Serb Respublikasının ordusunun Baş Qərargah rəisi olub. O, 26 may 2011-ci ildə Serbiyada saxlanılıb və ölkə hakimiyyəti tərəfindən Haaqaya təhvil verilib.
Reuters-in qeyd etdiyi kimi, Serbiya hakimiyyəti serb millətçilərinin əhəmiyyətli bir hissəsi üçün qəhrəman sayılan Mladiçə qarşı uzun müddət açıq şəkildə tədbir görməkdə tərəddüd edib. O, vaxtaşırı Belqradda at yarışlarında və ya futbol matçlarında görülürdü. Onun axtarışları yalnız 2009-cu ildə, Serbiyanın Avropa İttifaqına üzv olmağı planlaşdırdığı vaxt fəallaşdırılıb. Mladiç 2011-ci ildə həbs ediləndə Belqradda etiraz aksiyası keçirilib.
Qeyd edək ki, 22 noyabr 2017-ci ildə Haaqa Tribunalı onu 1992-1995-ci illərdə Bosniya və Herseqovinada baş vermiş vətəndaş müharibəsi zamanı törədilmiş hərbi cinayətlərə görə ömürlük həbs cəzasına məhkum edib.
1995-ci ildə keçmiş Yuqoslaviya üzrə Beynəlxalq Tribunalın müəyyən etdiyi kimi, onun komandanlığı altında Serb Respublikası ordusunun əsgərləri Srebrenitsada təxminən 8 min bosniyalı müsəlmanı qətlə yetirib. Bundan sonra Mladiç «Bosniya qəssabı» ləqəbini alıb.
2010-cu ildə Mladiçin gündəlikləri aşkar edilib. “Repubblica” nəşrinin məlumatına görə, o, gündəliklərində əsas prioritetinin müsəlman əhalidən xilas olmaq olduğunu yazıb.
Almaz Həsənli
