Polşada Ukrayna üçün dron istehsal edən zavodda yanğın baş verib

31 avqust gecəsi Polşa şirkətinin Skarzysko-Kamiennadakı WB Electronics fabrikində yanğın baş verib. Zavod, digər məhsullarla yanaşı, Polşa və Ukrayna orduları tərəfindən istifadə edilən hərbi dronlar və uçuş nəzarətçiləri istehsal edir. Oxuməni.az xəbər verir ki, bu barədə Onet məlumat yayıb.
Yanğın gecə yarısından 23 dəqiqə sonra başlayıb. Təxminən eyni vaxtda təhlükəsizlik şirkətinin operatoru sensorlardan zavodun ərazisinə mümkün müdaxiləni göstərən siqnal alıb və polisə xəbər verib.

Nəşrin məlumatına görə, müşahidə kameraları balaklava taxan bir kişinin hasardan zavoda girdiyini çəkmiş ola bilər. Hüquq-mühafizə orqanlarının əməkdaşları həmçinin yaxınlıqda atılmış bir çanta və uzunqol sviter də tapıblar. Xilasedicilərin sözlərinə görə, yanğın kiçik olub və təxminən iki saat ərzində söndürülüb. Bundan sonra Polşa Daxili Təhlükəsizlik Agentliyinin əməkdaşları zavoda gəliblər. Hərbi əks-kəşfiyyat da hadisə barədə məlumatlandırılıb.

Polis araşdırmaya başlayıb. Bu arada, Polşa kəşfiyyat orqanları hələlik yanğının təxribat aktı olduğunu təsdiqləməyib. Kəşfiyyat Xidmətlərini Koordinasiya Edən Nazirin mətbuat katibi Yaçek Dobrzinski bildirib ki, "Biz bu vəziyyəti çox ciddi qəbul edirik".

O, həmçinin təsdiqlənməmiş məlumatların təkzib edilməsinə çağırıb və Daxili Təhlükəsizlik Agentliyinin əməkdaşlarının "bunun təxribat aktı olub-olmadığını" araşdırdığını vurğulayıb.

Əziz MUSTAFA