NASA qalaktikaların xəritəsini çıxarmaq üçün teleskop buraxıb
"Falcon Heavy" raketdaşıyıcısı yeni flaqman rəsədxanası olan "Nancy Grace Roman"ı orbitə çıxarıb. Aparat ikinci pillədən ayrılaraq Yerdən 1,5 milyon km məsafədə yerləşən Laqranj L2 nöqtəsinə — Yer və Günəşin cazibə qüvvələrinin tarazlaşdığı və rəsədxananın sabit mövqeyini təmin edən bölgəyə doğru istiqamət alacaq. Oxuməni.az xəbər verir ki, bu barədə "Reuters" agentliyi məlumat yayıb.
Təxminən 4 milyard dollarlıq layihə qaranlıq enerji və qaranlıq maddənin öyrənilməsinə, həmçinin ekzoplanetlərin axtarışına yönəlib. Diametri 2,4 metr olan güzgüyə və 300 meqapiksellik infraqırmızı kameraya malik teleskop, Yerin orbitindəki "Hubble" avtomatik rəsədxanasından 100 dəfə daha geniş səma sahəsini əhatə edir. NASA-nın elmi əməkdaşı Culi MakEnerinin sözlərinə görə, "Roman" bir ay ərzində bütün Süd Yolu qalaktikasını nəzərdən keçirə və 20 milyarda qədər ulduzu qeydə ala bilər — "Hubble"a bunun üçün bir əsr vaxt lazım olardı. Rəsədxananın 2 milyarddan çox qalaktika haqqında məlumat toplayacağı və Yupiter ölçüsündə 2,5 min ekzoplanet kəşf edəcəyi gözlənilir.
NASA administratoru Cared Ayzekman bildirib ki, bu aparat "Hubble" və "Webb" ilə yanaşı, "evlərin hər birində tanınan bir ad"a çevriləcək. Əsas missiya beş il üçün nəzərdə tutulub və müddətin uzadılması mümkündür; ilk şəkillərin qış tətillərinə qədər əldə ediləcəyi gözlənilir. Teleskop agentliyin kosmik proqramının əsasını qoyan astronom Nensi Qreys Romanın şərəfinə adlandırılıb.
Almaz Həsənli
