“Microsoft”-un bazar dəyəri 4 trilyon dolları ötüb

NASDAQ birjasında əsas ticarət sessiyası başa çatdıqdan sonra şirkətin dördüncü rüb və bütün maliyyə ili üçün gözləniləndən daha güclü nəticələri dərc etdikdən sonra “Microsoft”-un səhmləri elektron ticarət zamanı demək olar ki, 9% bahalaşıb. Nəticədə şirkətin bazar dəyəri 4 trilyon dollar həddini keçib. Bu barədə Oxuməni.az “Kommersant.ru”ya istinadla xəbər verir.
CNBC-nin qeyd etdiyi kimi, bu artım bugünkü ticarət sessiyasında davam edərsə, “Microsoft” “Nvidia”-dan sonra 4 trilyon dollardan çox bazar dəyəri olan ikinci şirkət olacaq. Digər şirkətlər hələ ki, bunu bacarmayıb.
Dördüncü rübün nəticələrinə görə, “Microsoft”un gəliri 18% artım göstərib ki, bu da son üç ildən çox müddətdə ən sürətli artım tempidir və 76,4 milyard dollara çatıb. Əməliyyat mənfəəti 34,3 milyard dollar təşkil edib ki, bu da bir il əvvəllə müqayisədə 23% çoxdur. Xalis mənfəət 24% - 27,2 milyard dollar artıb. İlin yekunlarına görə, gəlir, əməliyyat mənfəəti və xalis mənfəət müvafiq olaraq 15%, 17% və 16% artıb.
“Microsoft”-un güclü nəticələrinin arxasında “Azure” və digərləri də daxil olmaqla bulud xidmətlərinə inamlı tələb dayanır. İlin yekunlarına görə, şirkətin bulud xidmətlərindən əldə etdiyi gəlir 34% artaraq 75 milyard dolları ötüb.
İlin əvvəlindən “Microsoft”-un səhmləri 22% artıb.
Almaz Həsənli