İyulda Rusiyanın neft gəlirləri üçdə bir azalıb

İyulda Rusiyanın neft gəlirləri ötən illə müqayisədə üçdə bir azalıb. Bu, dünya bazarında xam neftin qiymətinin azalması ilə əlaqədar baş verib.

Bu barədə RBC-Ukrayna Bloomberg-ə istinadən xəbər verir.

İyulda Rusiyada neftdən vergilər təxminən 33% azalaraq 710,4 milyard rubla (təxminən 8,9 milyard dollar) düşüb. Ümumilikdə neft və qaz gəlirləri 787,3 milyard rubl təşkil edib ki, bu da bir il əvvəllə müqayisədə 27% azdır. Bu sənayelər bütün büdcə gəlirlərinin təxminən üçdə birini təmin edir və onların azalması, xüsusən də müharibəyə böyük xərclər fonunda dövlət maliyyəsinin yükünü artırır.

Qərbin sanksiyaları və ABŞ-ın yeni məhdudiyyətlər təhdidləri fonunda Rusiya neft sənayesi mənfəət itirməkdə davam edir. Avropa İttifaqı Rusiya neftinin qiymət tavanını aşağı salacaq və ABŞ prezidenti Donald Tramp Rusiyanın enerji resurslarını alan ölkələri sanksiyalarla hədələyib.

Eyni zamanda, Bloomberg hesablamalarına görə, neft gəlirləri iyulda iyun ayı ilə müqayisədə 71% artıb. Bu, əsas vergilərdən birinin rüblük ödənilməsi ilə bağlıdır. Neft gəlirləri Urals neftinin iyun qiymətinə əsasən hesablanıb - 59,84 dollar/barel. Artıma baxmayaraq, bu, bir il əvvəllə müqayisədə hələ də 14% azdır.

Rublun möhkəmlənməsi ilə əlaqədar gəlirlər də azalıb: iyunda məzənnə orta hesabla bir dollar üçün 78,7 rubl təşkil edib - bu, son iki ildə maksimumdur. Nəticədə neftçilər bir barel üçün 4711 rubl (təxminən 58 dollar) alırdılarsa, bir il əvvəl bu göstərici 6127 rubl (təxminən 76 dollar) idi.

Əziz Mustafa