Neft ABŞ-ın İrana endirdiyi yeni zərbələrə reaksiya verib

Neft qiymətləri cümə axşamı mənfəətin götürülməsi (profit-taking) səbəbindən azalıb, lakin ABŞ-ın İrana endirdiyi yeni zərbələr və Hörmüz boğazında tədarükün kəsilməsi riski fonunda aylıq maksimumlar səviyyəsində qalıb.

Oxumənı.az xəbər verir ki, bu barədə "Reuters" məlumat yayıb.

"Brent" markalı neftin fyuçersləri 24 sent və ya 0,28% ucuzlaşaraq bir barel üçün 84,95 dollara düşüb. ABŞ-ın WTI markalı nefti isə 15 sent və ya 0,19% azalaraq 79,45 dollar təşkil edib. Sessiyanın əvvəlində "Brent"in qiyməti demək olar ki, 1 dollar bahalaşmışdı.

Çərşənbə günü ABŞ İranın limanlarına dəniz blokadasının bərpasından sonra İranın sahil müdafiə sistemlərinə və raket obyektlərinə zərbələr endirib. Tehran buna cavab olaraq regional enerji ixracı marşrutlarının daha çoxunu bağlayacağı ilə hədələyib.

Blokadanın bərpasından sonra Hörmüz boğazından keçən gəmilərin sayı azalıb: çərşənbə günü oradan cəmi yeddi gəmi keçib, bir gün əvvəl isə bu rəqəm 13 idi. Müharibə başlayana qədər dünya neft və mayeləşdirilmiş təbii qaz ticarətinin təxminən beşdə biri bu boğazdan keçirdi.

Analitiklər qeyd edirlər ki, güclü bahalaşmadan sonra treyderlər yeni eskalasiyanın tədarüklərin real azalmasına gətirib çıxarıb-çıxarmayacağını qiymətləndirirlər. Vəziyyətin daha da gərginləşməsi WTI markalı neftin qiymətini bir barel üçün 85–87 dollara qədər qaldıra bilər.

Bazar üçün əlavə risk kimi İranın dəstəklədiyi Yəməndəki husilərin münaqişəyə cəlb olunması qalır. Onlar gəmilərin Qırmızı dənizə daxil olduğu Babül-Məndəb boğazını bağlamağa cəhd edə bilərlər.

Almaz Həsənli