Bitkoin 65 min dollar səviyyəsindən yuxarı möhkəmlənə bilməyib

Bitkoinin (BTC) məzənnəsi son sutka ərzində 65 min dollardan yuxarı möhkəmlənmək üçün bir neçə cəhd edib, lakin bazar ertəsi səhər saatlarında 63,7 min dollara qədər düşüb. Sutka ərzində o, 1% ucuzlaşıb və iyulun 20-si Bakı vaxtı ilə saat 12:00-a olan məlumata görə, 64 min dollar ətrafında dəyişir. Oxuməni.az-ın məlumatına görə, bu barədə RBK xəbər verir.

May və iyun aylarında dəyərinin 20%-dən çoxunu itirən ilk kriptovalyuta, iyulun əvvəlindən bəri təxminən 10% bərpa olunub. Son iki həftədir ki, BTC 62-65 min dollar diapazonunda ticarət olunur.

Coinmarketcap-ın məlumatına görə, kriptovalyuta bazarının ümumi kapitallaşması 24 saat ərzində 1,76% azalaraq 2,16 trilyon dollara düşüb. Ticarət həcmi 48 milyard dollar təşkil edib. Ethereum-un (ETH) qiyməti bu müddət ərzində 3% ucuzlaşaraq 1,85 min dollara düşüb.

İlk 100 kriptovalyuta arasında sutka ərzində ən böyük artım 22% ilə Pump.fun (PUMP)-da qeydə alınıb. Ən çox ucuzlaşan isə 6% ilə "币安人生" (Binance Life) tokeni olub. Bu, BNB icmasının memkoinidir və adı "Binance həyatı" kimi tərcümə olunur.

SoSoValue-nun məlumatına görə, ABŞ-dakı spot bitkoin birja fondları (ETF) ötən həftənin yekunlarına görə 75 milyon dollar məbləğində xalis giriş qeydə alıb. ABŞ-dakı Ethereum fondlarına isə ötən həftə 105 milyon dollar daxil olub. Bu, həm bitkoin, həm də efir ETF-ləri üçün səkkiz həftəlik çıxışlardan sonra ardıcıl ikinci müsbət nəticəli həftə olub.

Kriptobazardakı 100 ballıq "Qorxu və tamah" indeksi 29-a yüksəlib. Bu, hələ də "qorxu" zonasıdır və demək olar ki, "həddindən artıq qorxu" zonası ilə sərhəddədir. Bazar əhval-ruhiyyəsi göstəricisinin bu səviyyələrdə olması investorların hələ də kriptovalyutaları satmağa meylli olduğunu göstərir.

Almaz Həsənli