Britaniya İsveçi "nüvə çətiri" altına almaq niyyətindədir
Britaniya İsveçi "nüvə çətiri" altına almaq barədə qarşı tərəflə danışıqlar aparır. Bu barədə The Daily Telegraph qəzeti Böyük Britaniya Baş naziri Kir Starmerin ofisinə istinadən məlumat yayıb.
Nüvə çəkindirmə məsələsi Böyük Britaniya Baş naziri ilə isveçli həmkarı Ulf Kristersson arasında telefon danışığı zamanı müzakirə olunub. Qəzetin məlumatına görə, danışıqlar ilkin mərhələdədir.
Bu, Britaniya nüvə silahı daşıyıcılarının İsveç ərazisində birbaşa, daimi və ya müvəqqəti yerləşdirilməsi ilə bağlı olub-olmadığı, yoxsa münaqişə halında Stokholmun Londonun nüvə imkanlarından istifadəsinə yalnız zəmanət verildiyi hələlik məlum deyil. Qəzet vurğulayıb ki, 2024-cü ilin mart ayında NATO-nun tamhüquqlu üzvü olan İsveç də Fransa ilə oxşar müzakirələr aparır.
Böyük Britaniyanın nüvə silahları ABŞ istehsalı olan Trident II (D5) ballistik raketlərini daşıyan dörd Vanguard sinifli sualtı qayıqda yerləşdirilib. 2025-ci ilin iyun ayında Starmer Londonun ABŞ-dan B61-12 taktiki termonüvə bombaları daşıya bilən 12 F-35A qırıcı təyyarəsi alacağını açıqladı.
2025-ci ilin mart ayında Fransa Prezidenti Emmanuel Makron həmvətənlərinə müraciətində müttəfiqləri ilə Avropa ölkələrini Fransanın nüvə silahının himayəsi altına qəbul etmək ehtimalı ilə bağlı müzakirələrə başlayacağını açıqladı. Almaniya, Polşa, Litva və Danimarka bu müzakirəyə açıq olduqlarını bildirdilər. "Financial Times" qəzeti qeyd etdi ki, ABŞ-ın Avropadakı müttəfiqləri ABŞ administrasiyasının Rusiya ilə yaxınlaşma siyasəti səbəbindən öz "nüvə qalxanı" yaratmaq imkanlarını araşdırırlar.
Əziz MUSTAFA
