İranda Məhsa Əmininin qətlinin ikinci ildönümü ilə bağlı anım tədbirləri keçirilib

Yerli teleqram kanallarının məlumatına görə, bazar günü Saqqız, Sənəndəc, Divandərə, Nayser, Bukana, Mərivan və Mahabad sakinləri iranlı qızın qətlinin ildönümünü qeyd etmək üçün kütləvi tətillər keçiriblər.
Sentyabrın 15-dən təhlükəsizlik qüvvələri Məhsa Əmininin dəfn olunduğu Saqqız vilayətində Aiçi qəbiristanlığının girişini bağlayıb.
İran şəhərlərində sakinlər üzərində plakatlar olan şarlar buraxır və Əmininin qətli ilə bağlı yazılar buraxırlar: “Qadınlar, həyat, azadlıq”, “Xamneyiyə ölüm!”, “İslam Respublikasına ölüm!”, “Məhsa Əmini”.
Şahidlərin sözlərinə görə, gənc etirazçılar iki il əvvəl Məhsa Əmininin ölümündən sonra qadın haqları hərəkatının himninə çevrilən iranlı müğənni Şervin Hacıpurun “Qadın, Həyat, Azadlıq” mahnısını ifa ediblər. Mərhum qızın ailə üzvlərinə onun məzarı başında dəfn mərasimi keçirilməsinə icazə verilməyib, qəbiristanlığa yaxınlaşmalar polis əməkdaşları tərəfindən nəzarətə götürülüb. Əmininin valideynləri ev dustağı ediliblər.
Saqqız gəncləri Məhsa Əmininin vəfatının ikinci ildönümünü qeyd etmək üçün atəşfəşanlıq ediblər.
İranın Evin həbsxanasındakı qadın məhbuslar etirazçılarla həmrəy olaraq aclıq aksiyasına başlayıblar. "Bu gün Evin həbsxanasında 34 qadın siyasi məhbus “Qadınlar, Həyat, Azadlıq” hərəkatının və Məhsa Əmininin qətlinin ikinci ildönümünü qeyd etmək üçün aclıq aksiyasına başlayıblar", - İran hüquq müdafiəçisi və Nobel Sülh Mükafatı laureatı Narges Mohammadinin təşkilatı bildirib.
22 yaşlı iranlı kürd qadın 2022-ci ilin payızında “əxlaq polisi” tərəfindən çadranı düzgün taxmamaqda ittiham edilərək saxlanılıb. Həbs edildikdən sonra o, xəstəxanaya yerləşdirilib və orada dünyasını dəyişib. Əmininin ölümü İranda son onilliklərin ən böyük etirazlarına səbəb oldu.

Almaz Həsənli