Qırx min insan təxliyə edilib

Yunanıstanın Türkiyədən cəmi 400 km uzaqlıqdakı Rodos adasındakı meşə yanğınları 7-ci günə girərkən, ölkənin Korfu adasından da yanğın xəbəri gəlib. Hər iki ərazidə alov evlərə və otellərə çatıb. Turistlər və yerli sakinlər yanğınla mübarizə aparsa da güclü külək alovun sürətlə yayılmasına səbəb olur. Təxminən 40 min insanın evlərindən və otellərindən təxliyə edildiyi bildirilir. Hava şəraitinin pisləşə biləcəyi barədə təxminlər edilir. NTV-nin yayımına qoşulan Rodosun baş konsulu Salim Kırcalıalı bildirib ki, yanğın bölgəsində olan Türkiyə vətəndaşları təxliyə edilib. Digər tərəfdən, Rodos adasından təxliyə edilən 95 turist isə bərə ilə Marmarisə gətirilib.

Xəbər verilir ki, Yunanıstanın Rodos adasının səlahiyyətliləri adanın cənub-şərqindəki kəndlərdən minlərlə yerli sakin və turisti təxliyə edib, ümumilikdə 40 minə yaxın insan təhlükəsiz yerə köçürülüb.

Yunanıstan İqlim Nazirliyindən verilən açıqlamada, "Bu təxliyə əməliyyatı ölkədə indiyə qədər həyata keçirilən ən böyük evakuasiya əməliyyatıdır" deyə bildirilib.

Yunanıstan Yanğınsöndürmə Xidməti BBC-yə açıqlama verərək, adadakı "qarışıqlığa" görə oradakı insanlardan üzr istəyib və hava şəraiti səbəbindən vəziyyətin daha da pisləşə biləcəyi barədə xəbərdarlıq edib.

Yunanıstan Yanğınsöndürmə Xidmətinin sözçüsü podpolkovnik Yannis Artopoios bu cür yanğınları agentliyin üzləşdiyi ən çətin vəziyyət kimi qiymətləndirib. Artopios verdiyi açıqlamada yanğının insan tərəfindən törədildiyini irəli sürüb. Yanğının qəsdən, səhlənkarlıqdan və ya qəza nəticəsində baş verdiyinin araşdırıldığını bildirən Artopios, ifadə vermək üçün çoxlu sayda adamın dindirildiyini qeyd edib.

Üç aktiv nöqtədə cəmləşən yanğının söndürülməsində 266 yanğınsöndürən, 42 texnika, 5 helikopter və 10 təyyarə çalışır. Rodosdakı yanğının ölkədəki aktiv yanğınlar arasında ən təhlükəlisi olduğuna diqqət çəkən səlahiyyətlilər, gün ərzində adaya 15 avtomobil və daha 60 yanğınsöndürən gələcəyini açıqlayıb.

Yunanıstan Yanğından Mühafizə Xidmətindən verilən digər açıqlamada axşam saatlarında başlayan yanğınla əlaqədar 12 yaşayış məntəqəsinin boşaldıldığı bildirilib.

Murad Şahməmməd