ABŞ-da Osmanlı İmperiyasının banisi Osman Qaziyə məxsus dəbilqə aşkar edilib

Türkiyəli tarixçi Hakan Yılmaz, Nyu-York Metropoliten İncəsənət Muzeyinin kolleksiyasında Osmanlı İmperiyasının (XIII-XIV əsrlər) banisi Osman Qaziyə məxsus olduğuna inandığı polad dəbilqə aşkar etdiyini açıqlayıb. Bu barədə Oxuməni.az “Yeni Şafak” nəşrinə istinadla xəbər verir.

Tədqiqatçının sözlərinə görə, Qətərdə ilk Osmanlı sikkəsini və Parisdə orijinal şəcərəni kəşf etdikdən sonra Osmanlı İmperiyasının quruluşuna aid başqa bir tarixi əsər tapa bilib.

Yılmaz iddia edir ki, dəbilqədə Osman Qazinin tuğrası və aydın görünən Kayı qəbilə nişanı var. O, həmçinin iddia edir ki, dəbilqənin üzərindəki ərəb yazısında "Sultan əl-Ə'zam" ("Böyük Sultan") və "Xan əl-Müəzzəm" ("Böyük Xan") titulları, eləcə də Osmanın adı var. Tədqiqatçı hesab edir ki, bu yazılar Osman Qazinin hökmdar kimi müstəqil statusunu təsdiqləyir və Osmanlı İmperiyasının erkən tarixi ilə bağlı bir sıra mübahisəli məsələlərə yeni bir perspektiv təqdim edir.

Yılmazın sözlərinə görə, dəbilqə əvvəllər amerikalı kolleksiyaçı Corc Kemeron Stounun kolleksiyasında olub və 1935-ci ildə vəfat etdikdən sonra varisləri tərəfindən Nyu-Yorkdakı Metropoliten İncəsənət Muzeyinə bağışlanıb.

Tarixçi həmçinin muzeyin kolleksiyasında Sultan I Murad Xudavendigara məxsus olduğuna inandığı başqa bir dəbilqə aşkar etdiyini bildirib. O, həmçinin bildirib ki, əvvəllər Sotheby's-də hərraca çıxarılan Filip Missilier kolleksiyasından bir dəbilqə Osmanlı Sultanı Orxan Qaziyə məxsus ola bilər.

Yılmaz qeyd edib ki, xaricdəki muzey kolleksiyalarında saxlanılan digər erkən Osmanlı hərbi əsərlərini araşdırmağa davam edir. O, Türkiyə hakimiyyətini Nyu-Yorkda aşkar edilmiş dəbilqə, Qətərdə tapılan sikkə və Parisdə saxlanılan şəcərə də daxil olmaqla, tarixi əsərləri ölkəyə qaytarmaq üçün addımlar atmağa çağırıb.

Almaz Həsənli