Reuters: Uitkoff Moskvada protokolu pozub
ABŞ prezidentinin xüsusi elçisi Stiv Uitkoff Rusiya prezidenti Vladimir Putinlə Moskvada görüş zamanı protokolu pozaraq, adətən qeydlər aparan Dövlət Departamentinin nümayəndəsi olmadan görüşə gedib. “Reuters” bir neçə mənbəyə istinadən xəbər verir ki, bu, çaşqınlığa səbəb olub və Uitkoff Kremlin mövqeyini təhrif edib.
Uitkoff avqustun 6-da Moskvada Putinlə görüşdən sonra ABŞ prezidenti Donald Trampa deyib ki, Rusiya prezidenti guya Ukraynada müharibəyə son qoymaq üçün əhəmiyyətli ərazi güzəştləri təklif etməyə hazırdır. Bunu eşidən Tramp Putinlə sammit keçirməyə razılaşıb.
Ertəsi gün Uitkoff bir neçə avropalı liderə deyib ki, Putin Kiyevin Donetsk və Luqanskdan imtina etməsi müqabilində Zaporojya və Xerson bölgələrindən qoşunları çıxarmağa hazırdır, söhbətdən xəbəri olan mənbə “Reuters” agentliyinə bildirib. Amerika və Avropa rəsmiləri də daxil olmaqla, dörd mənbə bildirib ki, təklif Putinin mövqeyinə dair öz qiymətləndirmələrindən kəskin şəkildə fərqləndiyi üçün “iştirak edənləri şoka salıb”.
Lakin ertəsi gün Uitkoff bildirib ki, Kreml faktiki olaraq Ukraynanın iki reqionundan qoşunların çıxarılmasını təklif etməyib, sadəcə olaraq Qərbdən Zaporojya və Xerson vilayətlərinin Rusiyanın bir hissəsi kimi rəsmən tanınmasını tələb etməyəcəyini açıqlayıb.
“Reuters” mənbələrinin məlumatına görə, bəzi Amerika rəsmiləri, o cümlədən Trampın Ukrayna üzrə müşaviri Keyt Kelloq Vaşinqtonun Rusiyaya qarşı daha sərt mövqe tutduğu bir vaxtda Uitkoffun Moskvadan ziddiyyətli məlumatlar gətirməsindən narazı idi.
Almaz Həsənli
