Özbəkistan ABŞ-da üç yeni konsulluq açacaq və hava xidmətini genişləndirəcək

Özbəkistan ABŞ-da üç konsulluq açmağı və yeni hava uçuşları açmağı planlaşdırır. Bu barədə Özbəkistanın ABŞ-dakı səfiri Furkat Sidikov 17 yanvarda səfirlər və sahibkarların görüşündə bildirib.

Onun sözlərinə görə, 2026-cı ildən etibarən ABŞ vətəndaşları üçün vizasız səyahət tətbiq olunacaq və bu da turizm sənayesi üçün yeni perspektivlər açacaq. O, Özbəkistan və ABŞ arasında münasibətlərin ilk dəfə ən yüksək səviyyəyə çatdığını və ölkənin ABŞ-dakı diplomatik mövcudluğunun genişləndiriləcəyini vurğulayıb.

"Tarixdə ilk dəfə olaraq Özbəkistan və ABŞ arasında münasibətlər ən yüksək səviyyəyə çatıb. Prezidentlərin qərarlarına əsasən, son 30 ildə Vaşinqtonda səfirliyimiz və Nyu-Yorkda baş konsulluğumuz olub. Lakin, son prezident qərarlarına uyğun olaraq, daha üç baş konsulluq - Çikaqo, San-Fransisko və Vaşinqton ştatında açmağı planlaşdırırıq", - deyə diplomatik nümayəndəliyin rəhbəri bildirib.

Səfir qeyd edib ki, bu, ölkənin turizm potensialının təşviqi üçün əlavə imkanlar yaradacaq. O, həmçinin xatırladıb ki, Özbəkistan hazırda regionda ABŞ-ı Mərkəzi Asiya və Avropa ilə birbaşa birləşdirən yeganə ölkədir.

"Özbəkistandan uçuşlar həftədə beş dəfə həyata keçirilir ki, bu da bir növ körpü rolunu oynayır və bundan fəal şəkildə istifadə olunmalıdır".

Furkat Sidikov hava xidmətinin coğrafiyasının genişləndirilməsinin də nəzərdən keçirildiyini bildirib:

"Biz Florida və ya Kaliforniyaya əlavə uçuşlar açmağı düşünürük. Bu, potensialın daha da genişlənməsi deməkdir".

Bu baxımdan, o, tur operatorlarını xüsusilə amerikalı turistlərə yönəlmiş məhsullar hazırlamağa çağırıb.

"Hörmətli tur operatorlarına xüsusi olaraq Amerika bazarına uyğun tur paketləri hazırlamağı təklif etmək istərdim. Bilirsiniz ki, ABŞ bazarı olduqca tələbkardır və standart, sadə təkliflər burada işləmir."

O, turist axınının artımı ilə bağlı statistikaya istinad etdi: "Yeni viza rejiminin tətbiqindən sonra keçən il Özbəkistana təxminən 40.000 insan səfər edib, 2024-cü ildə isə bu rəqəm təxminən 25.000 nəfər olub. Trend aydındır və düzgün yanaşma ilə bu rəqəm xeyli artırıla bilər."

Furkat Sidikov həmçinin ABŞ-da yaşayan özbək immiqrantlarına yönəlmiş "həmvətənlər üçün paketlər" (Vatandosh) hazırlamağı təklif etdi.

"Üçüncü nəsil özbək immiqrantları hazırda ABŞ-da böyüyür və onların bir çoxu dilini və vətənləri ilə əlaqələrini itirir. Əgər həmvətənlər üçün xüsusi turlar təklif etsək, əminəm ki, özbək ailələri uşaqlarını məmnuniyyətlə Özbəkistanla tanış etmək - onlara Səmərqənd, Buxara və digər tarixi yerləri göstərmək üçün gətirəcəklər."

Əziz MUSTAFA