Rusiyada inqilabdan qalma qızıl sikkələr xəzinəsi tapılıb

Rusiyalı alimlər Tver vilayətinin Torjok şəhərində İnqilabdan qalma qızıl sikkələr xəzinəsi aşkar ediblər. Bu barədə Rusiya Elmlər Akademiyasının Arxeologiya İnstitutunun saytında məlumat verilib.

Xəzinə 2025-ci ildə Sadovaya küçəsində yeni binanın tikintisindən əvvəl ərazidə aparılan araşdırma zamanı aşkar edilib. Arxeoloqlar Böyük Vətən Müharibəsi zamanı dağıdılmış bir binanın yerində tikilmiş taxta evin fraqmentlərini aşkar ediblər. Zirzəminin altındakı çuxurda 1848-1911-ci illər arasında zərb edilmiş 409 qızıl sikkənin olduğu gil qab tapılıb.

Mütəxəssislər bildiriblər ki, sikkələrin əksəriyyəti 5 ilə 15 rubl arasında nominalda olub və II Nikolayın hakimiyyəti dövrünə aiddir. Lakin xəzinədə II Aleksandr və I Nikolayın hakimiyyəti dövründə buraxılmış sikkələr də var idi. Tapılan sikkələrin ümumi dəyəri 4070 qızıl rubldur.

"1914-cü ildən 1921-ci ilə qədər evlərin sahibləri arasında Müqəddəs Demetrius Kilsəsinin keşişləri, iki tacir, xəzinədar, mühasib, ayaqqabı ustası, mexanik, katib, dərzi, məhkəmə komissiyasının üzvü, nəzarətçi və fəhlənin olduğu məlumdur. Xəzinənin onlardan kimin sahibi olduğu hələ məlum deyil", - deyə alimlər qeyd edərək əlavə ediblər ki, xəzinənin tezliklə Ümumrusiya Tarix və Etnoqrafiya Muzeyinə təhvil veriləcək.

Əvvəllər Böyük Britaniyada bir xəzinə ovçusu tərəfindən tarlada tapılan nadir sikkənin satıldığı bildirilirdi. Tapıntının eramızdan əvvəl 50-10-cu illər arasında Korieltau Kelt qəbiləsi tərəfindən zərb edilmiş qızıl stater olduğu ortaya çıxıb.

Əziz MUSTAFA