Diyetoloq limonlu suyun həzmi yaxşılaşdırıb-yaxşılaşdırmadığını açıqlayıb

Acqarına bir stəkan limonlu su içmək məşhur bir səhər ritualıdır. Ona həzmi işə salmaq, orqanizmi təmizləmək və yağları əritmək kimi xüsusiyyətlər aid edilir. Lakin bu iddiaların çoxu mifdir. Oxuməni.az xəbər verir ki, bu barədə "aif.ru" saytına diyetoloq Anastasiya Yefimova məlumat verib.

Ekspertin sözlərinə görə, həzm sisteminin xüsusi bir "işə salınmaya" ehtiyacı yoxdur — o, qida qəbulu zamanı avtomatik olaraq işə düşür. Orqanizm bütün prosesləri özü tənzimləyir və heç bir içki onu "sürətləndirə" bilməz.

Orqanizmin təmizlənməsi də qaraciyər və böyrəklərin təbii fəaliyyəti ilə təmin olunur. Su bu prosesə kömək edir, lakin limon əlavə etməyin burada əhəmiyyətli bir rolu yoxdur. Yağların yandırılmasına gəldikdə isə, limon maddələr mübadiləsini sürətləndirmir. Müsbət effekt yalnız o halda mümkündür ki, limonlu su şirin qazlı içkilər kimi daha kalorili içkilərin əvəzinə istifadə olunsun.

Həkim xəbərdarlıq edir ki, mədə-bağırsaq traktında xəstəlikləri olan insanlar üçün acqarına limonlu su içmək mədə yanğısına və narahatlığa səbəb ola bilər. Həmçinin, turşu diş minasını yumşaldır, buna görə də içkini samanla içmək və içdikdən sonra ağzı yaxalamaq məsləhətdir.

Almaz Həsənli