Rusiya Federasiyasında tabutların qiymətləri müharibə başlayandan bəri kəskin bahalaşıb
Rusiyanın Ukraynaya qarşı genişmiqyaslı hərbi təcavüzü başlayandan bəri bir tabutun hazırlanmasının dəyəri 74 faiz artıb - 2022-ci ilin yanvarında 4437 rubldan (74,50 manat) 2024-cü ilin oktyabrında 7711 rubla (129,47 manat ). Bu, cümə axşamı, dekabrın 5-də “The Moscow Times” (MT) tərəfindən qeyd olunan “Rosstatın” Vahid İdarələrarası İnformasiya və Statistika Sisteminin (EMISS) məlumatlarından irəli gəlir.
Tabutların sürətli bahalaşması artıq müharibənin ilk aylarından başlayıb. Belə ki, ilk altı ayda onların istehsalı 12 faiz və ya 548 rubl (9,20 manat) bahalaşıb. Rusiya hakimiyyəti səfərbərlik elan etdikdən qısa müddət sonra "cənazə inflyasiyasının yeni mərhələsi" baş verdi: 2022-ci ilin sentyabrından 2023-cü ilin fevralına qədər bu növ məhsulun qiymətləri dərhal üçdə bir artdı - 6,669 rubla (112 manat).
Bəzi bölgələrdə tabutlar xeyli bahalaşıb: Saxalində 181%, Omsk vilayətində 162%, Tambov və Smolensk vilayətlərində müvafiq olaraq 104% və 103%, “The Moscow Times” 2023-cü il üçün EMISS məlumatlarına istinad edir.
“Rosstat”ın statistikasına görə, Rusiya Federasiyasında qəbir qazmaq da bahalaşır. 2022-ci ilin yanvarında bu xidmət 7692 rubla (130 manat) başa gəlirdi, 2024-cü ilin oktyabrında isə artıq 9974 rubl (167,47manat), yəni 30 faiz çoxdur. Qəbirlərin qazılması xərclərinə görə rekord 2024-cü ilin fevralında qeydə alınıb - 10 187 rubl (171 manat).
İlin əvvəlindəki məlumatlara görə, Rusiyada bir dəfn mərasiminin təşkili 50 min rubldan (840 manat) başlayır, MT Dəfn Təşkilatları və Krematoriyalar İttifaqının rəhbəri Elena Andreevanın məlumatlarına istinad edir. Onun sözlərinə görə, dəfn xidmətlərinin bahalaşmasına “əsas alınan məhsulların – taxta və metalın bahalaşması” səbəb olub.
Almaz Həsənli
