Erməni lobbisinə sızan məşhur türk aktrisa: Ankaraya hansı məlumatları ötürüb? – Sensasion

Martın 21-də vəfat edən məşhur türk aktrisası Filiz Akınla bağlı səsləndirilən iddialar diqqət çəkib. Onun və atasının Türkiyə Milli Kəşfiyyat İdarəsinin (MİT) casusları olduğu bildirilir.

Oxuməni.az Globalinfo.az-a istinadən xəbər verir ki, 2 yanvar 1943-cü ildə Ankarada dünyaya gələn Filiz Akının atası, Ağır Cinayətlər Məhkəməsinin hakimi Beki Sami Akının həm də MİT-ə çalışdığı iddia edilir.

“Yeşilçam”ın “dörd yarpaqlı yoncasından biri” adlandırılan Filiz Akının orta təhsilini MİT-in himayəsi altında Ankarada Türkiyə Təhsil Dərnəyi adlı kollecdə tamamladığı deyilir. O, təhsil müddətində ingilis, fransız və alman dillərini yüksək səviyyədə öyrənib.

Məlumata görə, Akın kollecdən məzun olduqdan sonra xarici dil biliyi yaxşı olduğu və avropalılara bənzədiyi üçün əcnəbi bir turizm şirkətinin Ankara bürosuna tərcüməçi kimi sızdırılıb. Hətta Türkiyənin ən məşhur aktyorlarından, çərkəz əsilli, almanca, ingiliscə və rusca bilən Ediz Hunun da təşkilat tərəfindən eyni şirkətə Filiz Akınla birlikdə yerləşdirildiyi iddia olunur.

Hər iki şəxsin fəaliyyətləri müddətində ingilis, fransız və rus diplomatlarını, o cümlədən casuslarını diqqətlə izlədikləri bildirilir.

Jurnalist-yazar kimi Mahir Akkad adlı birinin imzası ilə yayılan məlumatlarda qeyd edilir ki, Ediz Hun Norveçdə erməni və kürd kəsiminin, lobbisinin fəaliyyətlərini izləmək üçün 1976-cı ildə elm sahəsinə belə sızdırılıb. Norveç universitetlərindən birində biologiya üzrə təhsil alıb. Hunun da atasının zamanında MİT-ə işlədiyinə dair müxtəlif fikirlər var.

Ediz Hun

O, İstanbulda Atatürk liseyindən məzun olduqdan sonra Almaniyada diş həkimliyi üzrə təhsil alıb. Hələ İstanbulda diş həkimi olaraq fəaliyyət göstərdiyi müddətdə MİT-in hərəkətə keçdiyi və onu “Səs” jurnalı vasitəsilə film dünyasına tanıtdığı deyilir.

Həmçinin Filiz Akının da Hunda olduğu kimi real fəaliyyətini gizlətmək məqsədi ilə gözəllik yarışmasına qatıldığı, film dünyasına yolunun açıldığı yazılır. Beləliklə onun ümumilikdə 13 il davam edəcək aktrisalıq karyerası başlayıb. Akın 1964-cü ildə “Qadın bərbəri” filminin çəkiliş meydançasında tanış olduğu, özü kimi MİT-ə xidmət etdiyi deyilən rejissor Türker İnanoğlu ilə evlənib. Bir il sonra oğlu İlkər İnanoğlu dünyaya gəlib. 1974-cü ildə İnanoğlundan boşanan aktrisa, 1975-ci ildə “Ataların atası” filmi ilə karyerasına fasilə verib.

Ən çox rezonans doğuran iddialar isə onun erməni lobbisi və terrorçularının arasına sızması ilə bağlıdır. Belə ki, Akının MİT-in yönləndirməsi ilə 1982-ci ildə erməni əsilli biznesmen Bubi Rubinstein adlı şəxsi özünə aşiq etdiyi, onunla evlənərək Parisə köçdüyü deyilir. Bununla da Avropadakı yuxarı sinif diplomatların icmalarının arasına girməyi bacarıb. Məlumata görə, Akın Parisdə olduğu illər ərzində buradakı erməni icmalarının, ASALA terror təşkilatı və diasporun hərəkətlərini diqqətlə izləyib, bir-bir bütün məlumatları Ankaraya göndərib.

1989-cü ildə “Geçmiş Bahar Mimozaları” adlı serial ilə yenidən kamera qarşısına keçib. 1992-ci ildə ilk kitabını yazıb. 1993-cü ildə erməni biznesmendən boşanıb. Bir il sonra həmin dövrdə MİT rəsmilərindən Sönməz Köksalla ailə həyatı qurub. Hətta o zamankı Türkiyə Prezidenti Süleyman Dəmirəl və Türkiyə parlamentinin sədri cütlüyün nikah şahidləri olublar. 2002-ci ildə xərçəng xəstəsi olduğu müəyyənləşib və lakin müalicə alaraq xəstəliyə qalib gəlməyi bacarıb.

Filiz Akın

1991-ci ildə Parisdə olduğu müddətdə atası qətlə yetirilib. MİT məsələyə qarışıb və araşdırmaya başlayıb. Qatil qısa müddətdə tapılıb və həbs edilib. Daha sonra qatil həbsxanada kimliyi bilinməyən bir məhkum tərəfindən öldürülüb. Bu hadisənin arxasında Akının olduğu, atasının qisasını altdığını deyənlər də var.

Aktrisanın MİT-lə əlaqələrinin olduğuna dair iddialar bundan əvvəl 2012-2013-cü illərdə gündəmə gəlib. İlk olaraq hakim Ədalət və İnkişaf Partiyasının (AKP) deputatlarından Şamil Tayyar Filiz Akının keçmişdə MİT-lə işlədiyinə dair fikirlər səsləndirib. Daha sonra türkiyəli jurnalist Dərya Kırıcının ASALA-dan bəhs edən kitabında bir türk qadın casusla bağlı məlumatlar qeyd edilib. Müəllifin təsvir etdiyi obraz tamamilə Filiz Akına uyğun olub. Beləliklə deputatın iddiası yenidən gündəmə gəlib və mətbuat bu məsələyə diqqət çəkib. Kitabda Səlma adlı bir aktrisanın MİT-lə işlədiyi, ASALA-nın çökdürülməsi üçün İstanbul, Paris, Sürix və Afinada iştirak etdiyi əməliyyatlardan bəhs olunur. Bütün bu kriteriyalar isə oxları Filiz Akına çevirib.

Qeyd edək ki, zaman-zaman sözügedən iddialar təkrar gündəmə gəlsə də, hər hansı təsdiq, yaxud konkret inkar yayımlanmayıb. Bu istiqamətdə dəqiq mənbə, yaxud rəsmi sənəd də təqdim edilməyib. Səsləndirilən fikir və qeydlər hələ də iddia kimi gündəmdə saxlanılır.