Argentinada daşqınlar nəticəsində zəhərli ilanlar və timsahlar məhəllələrə axışıb

Argentinada güclü yağışların yaratdığı daşqınlar vəhşi təbiətə də təsir edib. Daşqınlar nəticəsində timsahlar, zəhərli ilanlar və çoxsaylı vəhşi heyvanlar yaşayış yerlərinə axışıb.

Oxuməni.az xəbər verir ki, Argentina Təbii Fəlakətlərə qarşı Mübarizə İdarəsinin məlumatına görə, daşqın nəticəsində iki nəfər ölüb, 2000-dən çox insan evlərini tərk etmək məcburiyyətində qalıb. Hakimiyyət orqanları vətəndaşları təhlükəli heyvanlara yaxınlaşmamaq barədə xəbərdar edib.

Argentinanın şimal-şərqindəki Korrientes və Misiones əyalətlərini təsir edən daşqınlar çayların ətrafındakı təbii yaşayış yerlərini su altında qoyub. Parana və Uruqvay çaylarında suyun səviyyəsinin artması yakare kaymanlarının (timsah kaymanları), zınqırovlu ilanların, zəhərli yarara ilanlarının və kiçik maral növlərinin təhlükəsizlik axtarışı üçün yaşayış yerlərinə köç etməsinə səbəb olub.

Xüsusilə, Korrientes şəhərində çay kənarındakı gəzinti yerlərində vəhşi heyvanlar müşahidə edildikdən sonra xilasetmə qrupları hərəkətə keçdi.

Bu səhər Korrientesdəki Mitre Parkında zəhərli yakare ilanı görülüb.

Pellegrini küçəsi yaxınlığındakı sahil ərazisində zəhərli zınqırovlu ilan və qanadı zədələnmiş su quşu da tapılıb. P

Daşqınların yaratdığı təhlükə Korrientes əyalətindəki Qoya yaxınlığında baş verən hadisə ilə bir daha vurğulanıb. 15 yaşlı Ezequiel bir ailənin heyvanlarını təxliyə etməsinə kömək edərkən zınqırovlu ilan tərəfindən dişlənib.

Zəhər ciddi orqan disfunksiyasına səbəb olub və uşaq reanimasiyaya yerləşdirilib. Yerli media uşağın müalicəsinin davam etdiyini bildirib. Mütəxəssislər, xüsusən də daşqın sularının çəkildiyi ərazilərdə ot və qayalıq ərazilərdə gizlənən ilanlara qarşı diqqətli olmağa çağırıblar.

Korrientesdəki Aguara Vəhşi Təbiəti Mühafizə Mərkəzi sözçüsü Katalina Mansedo bildirib ki, heyvanların çoxu sahilə çatmazdan kilometrlərlə əvvəl suya atılıb və bu, onları yorğun və stressli edib. Xilas edilən heyvanların tibbi müayinədən keçirildiyi, vəziyyətinin yaxşı olduğu və yaralıların müalicə olunduğu bildirilir.

Argentinanın şimal-şərqində baş verən daşqınlar iki nəfərin ölümünə və 2000-dən çox insanın evsiz qalmasına səbəb olub. Çako əyalətində təxminən 1200-1300 insanın təxliyə edildiyi, Korrientesdə isə 1000-dən çox insanın evsiz qaldığı bildirilir.

Korrientesdə iki ferma işçisinin heyvanlarını daşqından xilas etməyə çalışarkən boğulduğu bildirilir. Misiones əyalətində güclü yağışlar və fırtınalar 100-dən çox evə ziyan vurub. Bəzi yollar və körpülər nəqliyyat üçün bağlanıb.

Əziz Mustafa