Rusiyanın Novomoskovsk şəhərinə dronlar hücum edib: Azot kimya zavodunda yanğın baş verib

28 oktyabr çərşənbə günü səhər tezdən Rusiyanın Tula bölgəsindəki Novomoskovsk şəhərinə dronlar hücum edib. Hücum nəticəsində Azot kimya zavodunda yanğın başlayıb.

Oxuməni.az xəbər verir ki, bu barədə OSINT və Rusiyanın Telegram kanalları məlumat yayıb.

Qeyd etmək lazımdır ki, Novomoskovskdakı yanğının görüntüləri bu səhər təxminən saat 6:00-da sosial mediada geniş yayılmağa başladı. Ruslar hücumdan şikayətləndilər və dronların şəhərdəki bir obyektə zərbə endirdiyini bildirdilər. Əvvəlcə yanğının dəqiq səbəbi məlum deyildi. Artıq səhər saat 4-də Tula vilayətinin qubernatoru Dmitri Milyayev sosial mediada bölgə üçün raket həyəcanı elan edildiyini paylaşdı. Lakin tezliklə bunun dron hücumu olduğu məlum oldu.

OSINT ictimai qruplarının məlumatına görə, Rusiyada ən böyük azot gübrələri istehsalçılarından biri olan Azot kimya zavoduna zərbə endirilib. Hücumdan sonra zavodun ərazisində böyük yanğın baş verib.

Bu zavod ammonyak, ammonium nitrat, karbamid və metanol istehsal edir. Ukrayna Xarici Kəşfiyyat Xidmətinin məlumatına görə, kimya zavodu partlayıcı maddələr istehsal edən Dzerjinskdəki Sverdlov zavoduna azot turşusu tədarük edib.

Hücumdan qısa müddət sonra regional qubernator sənaye zonasında ziyanın qeydə alındığını təsdiqləyib. O, həmçinin Tula vilayətinin Priroda Dövlət Müəssisəsinin və Tula vilayəti üçün Rospotrebnadzor İdarəsinin laboratoriyalarının şəhərə göndərildiyi barədə xəbərdarlıq edib.
Xatırladaq ki, dünən gecə Rusiyanın bir neçə bölgəsində də raket xəbərdarlığı edilib. Tezliklə məlum olub ki, Lipetskdə Novolipetsk Dəmir və Polad Zavodu yaxınlığında yanğın baş verib. Yerli hakimiyyət orqanları hələlik vəziyyətlə bağlı şərh verməyib.

Əziz MUSTAFA