Gmail istifadəçilərinə üç dəfəyə qədər ünvanlarını dəyişdirməyə icazə veriləcək

Google, @gmail.com domenindəki elektron poçt ünvanlarını dəyişdirməyə imkan verəcək. Əvvəllər belə bir seçim yox idi və şirkət dəstək səhifəsində Gmail ünvanının dəyişdirilə bilməyəcəyini birbaşa qeyd edirdi. Bu barədə Oxuməni.az “9to5Google”a istinadla xəbər verir.
Lakin Google-un Hindistan dəstək səhifəsində yeni funksiyanın mərhələli tətbiqi barədə aydınlaşdırma yerləşdirilib. Qeyd olunur ki, istifadəçilər mövcud @gmail.com ünvanlarını yeni ünvanla əvəz edə biləcəklər. Ünvan dəyişdirildikdən sonra köhnə e-poçt silinməyəcək, lakin təxəllüs kimi qalacaq. İstifadəçi həm köhnə, həm də yeni ünvana məktublar almağa davam edəcək. Bütün hesab məlumatları - yazışmalar, fotoşəkillər, fayllar, xidmət tarixi - dəyişmədən qalacaq.
Bununla belə, bir sıra məhdudiyyətlər nəzərdə tutulub. Köhnə ünvanı yeni hesab yaratmaq üçün dərhal istifadə etmək mümkün olmayacaq - bu yalnız 12 aydan sonra mümkün olacaq. Yeni ünvanı silmək də mümkün olmayacaq. Gmail, YouTube, Google Drive, Maps və Google Play daxil olmaqla Google xidmətlərinə daxil olmaq istənilən ünvandan mümkün olacaq.
Təsvirə görə, bir hesab ünvanını üç dəfədən çox dəyişdirə bilməyəcək, yəni ümumilikdə istifadəçi dördə qədər Gmail ünvanına sahib ola biləcək.
Google hələlik bu funksiyanın tətbiqi barədə rəsmi açıqlama verməyib. Görünür ki, hazırda bu yenilik bəzi regionlarda sınaqdan keçirilir.
Almaz Həsənli