Keçmiş mer və keçmiş repçinin partiyası Nepal parlamentində çoxluq əldə edib

Keçmiş Katmandu meri və keçmiş repçi Balendra Şahın rəhbərlik etdiyi Milli Müstəqil Partiya ("Rastriya Swatantra") seçkilərin nəticələrinə görə Nepal parlamentinin aşağı palatasında mütləq çoxluq əldə edib. Oxuməni.az xəbər verir ki, bu barədə BBC məlumat yayıb.
Nepal Seçki Komissiyası yekun nəticələri hesabladıqdan sonra Şahın partiyasının Nümayəndələr Palatasındakı 265 yerdən 182-ni qazandığını bildirib. Bu, onlara müstəqil hökumət qurmağa imkan verəcək.
Gözlənilir ki, 35 yaşlı Şah yaxın vaxtlarda ölkənin baş naziri təyin olunacaq. BBC-nin qeyd etdiyinə görə, yeni hökumətin qurulması təxminən bir həftə çəkəcək.
Şahın Nepalın paytaxtının meri kimi siyasi təcrübəsi dörd ilə yaxındır. Lakin onun siyasətdə nisbətən yenicə olması bir çox seçici tərəfindən üstünlük kimi qəbul edilir.
Şahın partiyasının əsas seçki vədlərindən biri korrupsiya ilə mübarizə və ölkənin məhkəmə sisteminin islahatı olub. "Rastriya Swatantra" həmçinin iqtisadiyyatda uğur qazanmağı planlaşdırır. Partiyanın proqramında onun illik 7% artımı vəd olunur.
Parlament seçkiləri 5 mart 2026-cı ildə Nepalda keçirilib və son illərin ən gərgin seçkilərindən biri olub. Nepal seçki komissiyasının məlumatına görə, seçicilərin iştirakı təxminən 60% təşkil edib.
Balendra Şah siyasətə gəlməzdən çox əvvəl, mahnılarında korrupsiya, yoxsulluq və sosial bərabərsizliyi tənqid edən rep ifaçısı kimi geniş tanınıb. 2022-ci ildə o, müstəqil namizəd kimi Katmandu meri seçilib. Onun hazırkı seçkilərdəki uğuru bir çoxları tərəfindən siyasi yenilənməyə və gənc nəslin ölkənin idarə olunmasında rolunun gücləndirilməsinə olan artan ictimai tələblə əlaqələndirilir.
Almaz Həsənli