Kallas: AB Rusiya ilə enerji müqavilələri bağlamaq niyyətində deyil

Avropa diplomatiyasının rəhbəri Kaja Kallas bildirib ki, qiymətlərin artmasına baxmayaraq, Avropa İttifaqı Rusiya ilə enerji müqavilələri bağlamaq niyyətində deyil. Onun sözlərinə görə, bu barədə, o cümlədən pərdəarxası müzakirələr aparılmır.

"Mən bu bağlı qapılar arxasında olmuşam və belə bir istək görməmişəm", Kallas Reuters agentliyinə verdiyi müsahibədə deyib. "Rusiya ilə danışanda, əlbəttə ki, ən vacib şey əvvəlcə onlarla nəyi müzakirə etmək istədiyimizi razılaşdırmaqdır."

Xanım Kallas əlavə edib: "Əgər sadəcə "həmişəki kimi iş"ə qayıtsaq, daha çox müharibələrimiz olacaq. Biz bunu əvvəllər də görmüşük. Buna görə də çox ayıq olmalı və Rusiyaya istədiklərini verməməliyik, çünki onların iştahası yalnız artacaq."

Yanvar ayının sonunda Aİ Şurası 2027-ci ildən etibarən Rusiyadan mayeləşdirilmiş təbii qaz idxalını tamamilə qadağan etmək planı ilə razılaşdı. Aİ üzv dövlətlərinə yanacaq tədarükünə qoyulan qadağa 30 sentyabr 2027-ci ildə tətbiq olunacaq. Slovakiya və Macarıstan bu təşəbbüsə qarşı çıxdılar. Martın əvvəlində Norveçin energetika naziri Terje Aasland Aİ-nin İrandakı münaqişə səbəbindən Rusiya qazının qadağan edilməsini yenidən müzakirə edəcəyini təklif etdi. Avropa Komissiyasının prezidenti Ursula fon der Leyen Rusiyanın enerji ehtiyatlarına qayıtmasının Aİ üçün strateji səhv hesablama olacağını bildirdi.

Əziz MUSTAFA