Politico: Tramp Ukraynadakı müharibəni bitirmək və Çinin təsirini zəiflətmək üçün Rusiyanı dünya iqtisadiyyatına qaytarmaq istəyir

Donald Tramp administrasiyası hesab edir ki, Rusiyaya Ukraynadakı müharibəni bitirmək üçün stimul təklif etmək, onu dünya iqtisadiyyatına qaytarmaq və ölkəyə Amerika investisiyaları cəlb etmək ABŞ-ın Çinlə qarşıdurmasında qlobal güc balansını dəyişməyə kömək edəcək. Oxuməni.az xəbər verir ki, bu barədə “Politico” nəşri yazır.
Tramp administrasiyasının nümayəndələrindən birinin sözlərinə görə, "Rusiya ilə yaxınlaşma" yolu tapmaq ABŞ-ın Çinlə münasibətlərində Vaşinqton üçün sərfəli olacaq "fərqli güc balansı" yarada bilər.
Bu strategiya Ağ Evin Çinin təsirini cilovlamağa yönəlmiş daha geniş xarici siyasət xəttinə uyğundur. Buraya, xüsusən, Venesuela prezidenti Nikolas Maduronun devrilməsi və Kuba hökumətinə təzyiq daxildir ki, bu da Çinin Qərb yarımkürəsindəki təsirini azaldır.
Çinə qarşı çıxmaq Ağ Evin Rusiya və Ukraynanı sülhə gətirməyə çalışmasının yeganə səbəbi deyil, lakin “Politico” qeyd edir ki, bu, Tramp nümayəndələrinin aylar boyu nəticəsiz danışıqlardan sonra niyə bu məqsəddən hələ də əl çəkmədiklərini izah etməyə kömək edir. Rusiya ilə təmaslar, Moskvanın Amerika hədəflərinə zərbələr endirmək üçün İranla kəşfiyyat məlumatlarını paylaşdığı barədə xəbərlərə baxmayaraq davam edir.
“Politico” yazır ki, Rusiyaya ABŞ ilə yaxınlaşmaq üçün iqtisadi stimul vermək ideyası Ukraynada narahatlıq doğurur. "Biz bunu əvvəllər də sınamışıq - və heç bir nəticə verməyib", - Ukraynalı bir rəsmi nəşrə bildirib və Almaniyanın "şərq siyasəti" çərçivəsində Rusiya ilə yaxınlaşmağa çalışdığını, lakin bunun müharibəni dayandırmadığını xatırladıb.
Almaz Həsənli