Hörmüz boğazı yalnız atəşkəs elan olunduqdan sonra açılacaq

İranın yüksək rütbəli bir rəsmisi bildirib ki, Hörmüz boğazı yalnız regionda silahlı qarşıdurma başa çatdıqdan və Tehranın irəli sürdüyü şərtlər tam yerinə yetirildikdən sonra azad gəmiçilik üçün açılacaq. Bu barədə Oxuməni.az “TASS” agentliyinə istinadla xəbər verir.
"Boğaz yalnız tam atəşkəs və İranın şərtlərinə güzəştsiz əməl olunduqda açılacaq", - rəsmi, “Al Jazeera” telekanalının sitat gətirdiyi sözləri ilə vurğulayıb.
Regionda vəziyyətin gərginləşməsi fonunda Beynəlxalq Dəniz Təşkilatı (IMO) ABŞ və İsrailin İranla münaqişəsinin Fars körfəzində gəmiçiliyə və dənizçilərin təhlükəsizliyinə təsiri ilə bağlı "fövqəladə sessiya" keçirəcək. AFP agentliyinin məlumatına görə, iki gün davam edəcək danışıqlarda bir neçə mümkün qətnamənin müzakirəsi planlaşdırılır.
Hörmüz boğazı Fars körfəzi ilə Oman körfəzi arasında dar bir dəniz keçididir. Bu, strateji əhəmiyyət kəsb edir, çünki dünya neft tədarükünün təxminən 20%-i və mayeləşdirilmiş təbii qazın (MTQ) dünya ixracının təxminən 25%-i buradan keçir. Əslində, bu, Asiya, Avropa və hətta ABŞ ölkələri üçün enerji arteriyasıdır. Boğaz İranı və Omanı ayırır və gəmiçilik kanalının eni bəzi yerlərdə hər istiqamətdə cəmi iki mil təşkil edir.
Hörmüz boğazında çox sayda kiçik, yaşayış olmayan adalar və səkkiz böyük yaşayışlı ada yerləşir. Onların ən əhəmiyyətliləri boğaza adını verən Hörmüz, həmçinin Kəşm (su sahəsində ən böyük ada), Larak, Hengam, Böyük Tunb və Əbu Musa adalarıdır - hamısı İranın yurisdiksiyası altındadır. Larak adasının cənubunda Omanın Sumandam yarımadası və yaxınlıqdakı Əs-Salam arxipelaqı adaları yerləşir. Boğazın şimalında böyük İran limanı Bəndər-Abbas yerləşir. Cənub tərəfində isə Dubaya gedən yüklərin daşınmasında mühüm rol oynayan Fuceyra, Cəbəl Əli və Xor-Fəkkən limanları yerləşir.
Almaz Həsənli