Tarixdə ilk dəfə 100 dollarlıq əsginaslarda fəaliyyətdə olan prezidentin- Donald Trampın imzası yer alacaq

Yaxın vaxtlarda ABŞ-ın gələcək kağız dollarlarında, Maliyyə Nazirinin imzası ilə yanaşı, Donald Trampın da imzası yer alacaq. Oxuməni.az “Reuters” agentliyinə istinadla xəbər verir ki, bu barədə ABŞ Maliyyə Nazirliyi məlumat yayıb.
Bəyanatda qeyd olunur ki, tarixdə ilk dəfədir ki, Amerika valyutasında fəaliyyətdə olan prezidentin imzası olacaq. Bundan əvvəl əsginaslarda ənənəvi olaraq xəzinədarın imzası olurdu – yeni əsginaslarda bu imza olmayacaq, bu, 165 il ərzində ilk dəfədir.
Maliyyə Naziri Skott Bessentə görə, yeni əsginaslar bu il qeyd olunan Amerikanın 250 illik yubileyi münasibətilə buraxılacaq.
"Prezident Trampın rəhbərliyi altında biz misli görünməmiş iqtisadi artım, dolların uzunmüddətli hökmranlığı, həmçinin maliyyə gücü və sabitliyi istiqamətində irəliləyirik. Böyük ölkəmizin və Prezident Donald Trampın tarixi nailiyyətlərini qeyd etmək üçün onun adını dollar əsginaslarına yerləşdirməkdən daha aydın bir yol yoxdur," - deyə Bessent bildirib.
ABŞ Xəzinədarı Brandon Biç, prezidentin Amerikanın iqtisadi dirçəlişinin "qızıl dövrünün memarı" kimi tarixə verdiyi töhfəni danılmaz adlandırıb. Onun sözlərinə görə, Trampın imzasının Amerika valyutasında yerləşdirilməsi "təkcə məqsədəuyğun deyil, həm də tamamilə layiqincədir".
“Reuters” agentliyinin yazdığına görə, Donald Trampın və Maliyyə Naziri Skott Bessentin imzalarının olduğu ilk 100 dollarlıq əsginasların iyun ayında çap olunması planlaşdırılır.
Trampın təsvirinin Amerikanın 250 illik yubileyi münasibətilə buraxılacaq bir sıra digər materiallarda da yer alması planlaşdırılır. İncəsənət Komissiyası (Tramp tərəfindən formalaşdırılıb) yaxın zamanda prezidentin yumruqları sıxılmış halda masanın arxasında dayandığı təsvir olunan böyük xatirə qızıl pulun dizaynını təsdiqləyib. Komissiya həmçinin Trampın təsvir olunduğu bir dollarlıq pulun layihəsini də nəzərdən keçirir.
Almaz Həsənli