ABŞ Bolqarıstandan ekstradisiya edilən ruslara qarşı çirkli pulların yuyulması ilə bağlı cinayət işi açıb

ABŞ hakimiyyəti Bolqarıstandan ekstradisiya edilən rusiyalılar Sergey İvin və Oleq Olşanskini çirkli pulların yuyulması ilə bağlı sui-qəsddə və sanksiyaları pozmaqda ittiham edib. RİA Novosti bu barədə məhkəmə sənədlərinə istinadən məlumat verir.

İş materiallarına görə, ABŞ hakimiyyəti iddia edir ki, təxminən 2017-ci ilin may ayı ilə 2021-ci ilin may ayı arasında İvin və Olşanski digər şəxslərlə birlikdə ABŞ sanksiyalarını və əlaqəli qaydaları qəsdən pozublar.

Müstəntiqlərin fikrincə, onlar ABŞ vətəndaşlarını sanksiya tətbiq edilən şəxslərin və təşkilatların xeyrinə vəsait almağa və ya köçürməyə, eləcə də ABŞ qanunlarını pozan əməliyyatlarda iştirak etməyə təhrik ediblər.

Bundan əlavə, ittiham aktında deyilir ki, təqsirləndirilən şəxslər digər şəxslərlə birlikdə ABŞ qanunlarını pozmaq məqsədilə ABŞ-dan kənara və digər ölkələr vasitəsilə pul və alətləri daşımağa, köçürməyə və ötürməyə cəhd ediblər.

Olşanski və İvinin həbsi 19 dekabrda elan edilib. Konsulluq əməkdaşları Sofiya istintaq təcridxanasında onları ziyarət edib, onlarla və vəkilləri ilə əlaqə saxlayıb və məhkəmə iclaslarında iştirak ediblər. Daha sonra Bolqarıstan məhkəməsi ekstradisiyanı təsdiqləyib və ruslar 26 martda ABŞ-a təhvil veriliblər.

Əziz MUSTAFA