ABŞ Xüsusi Təyinatlı Qüvvələrinin sirlərini açan amerikalı qadını 40 ilə qədər həbs cəzası gözləyir
Elit Delta Force bölməsi haqqında məxfi məlumatları jurnalistə ötürməkdə ittiham olunan ABŞ Fort Braqq hərbi bazasının keçmiş əməkdaşı Kortni Uilyams 40 ilə qədər həbs cəzası və ən azı 15.000 dollar cərimə gözləyir. Bu barədə RİA Novosti məlumat yayıb.
Uilyams müdafiə məlumatlarının toplanması, ötürülməsi və ya itirilməsi ilə bağlı eyni cinayətin dörd maddəsi ilə üzləşir. İttiham aktına görə, 2022-2025-ci illər arasında o, bilərəkdən sosial mediada məxfi məlumatları yayıb və həmçinin bölmənin taktikası, metodları və prosedurları haqqında jurnalistə məlumat ötürüb ki, bundan da sonradan məqalədə və kitabda istifadə edilib.
Ayrı-ayrı ittihamlar eyni jurnalistin bölmənin işçilərinin əsl adlarını, eləcə də xarici ölkədə gizli əməliyyat zamanı onların tutulması barədə məlumatları təqdim etməsi ilə bağlıdır. Başqa bir ittiham 26 yanvar 2026-cı illə bağlıdır və informasiya məkanını formalaşdırmaq məqsədilə bölmənin iş metodları və özəl şirkətlərlə qarşılıqlı əlaqələri haqqında məlumatın naməlum şəxslərə ötürülməsi ilə bağlıdır.
İttihamnamədə prokurorluq həmçinin Uilyamsdan prokurorluğun xərclərinin ödənilməsi üçün ən azı 15.000 dollar ödəməsini tələb edir.
Uilyams bir neçə il həmin bölmədə mülki işçi kimi çalışıb. O, gizli bölmənin metodları haqqında yazan və oradakı təqib və sui-istifadə ilə bağlı reportajlarında ona istinad edən araşdırmaçı jurnalist Set Harpın məqaləsində və kitabında birbaşa mənbə kimi göstərilib. Prokurorluğun məlumatına görə, Uilyams məxfi məlumatları, o cümlədən zabitlərin əsl adlarını və konkret əməliyyatların təfərrüatlarını açıqlayıb.
Əziz MUSTAFA
