Anthropic şirkəti süni intellekt kontentini markalayacaq
Süni intellekt modellərinin tərtibatçısı olan Anthropic şirkəti, süni intellekt tərəfindən yaradılmış məzmunun (kontent) şəffaflığının təmin edilməsi üzrə Təcrübə Kodeksini imzaladığını açıqlayıb. Oxuməni.az xəbər verir ki, mətbuat üçün açıqlamada qeyd olunur ki, bu sənəd Aİ-nin "Süni İntellekt haqqında Qanunu"nun 50(2)-ci maddəsinə uyğun olaraq hazırlanıb.
Bildirilir ki, avqustun 2-dən etibarən yeni Claude modelləri vasitəsilə yaradılan məzmun kompüter tərəfindən tanınan müvafiq markalanma ("su nişanı") ilə təmin ediləcək. Şirkət zaman keçdikcə oxşar mexanizmləri daha əvvəlki Claude modelləri ilə yaradılmış məzmunlara da tətbiq etməyi planlaşdırır. Bununla belə, Anthropic qeyd edib ki, markalanmanın olmaması məzmunun süni intellekt vasitəsilə yaradılmadığına dair zəmanət vermir.
Musiqi axını (striminq) xidməti olan Spotify sentyabrın ortalarından etibarən musiqilərini süni intellekt vasitəsilə yaratdığı ehtimal olunan ifaçıları xüsusi "AI Persona" teqi ilə işarələyəcək. Belə sənətçilərin trekləri, istifadəçi həmin süni intellekt ifaçısının abunəçisi olmadığı təqdirdə, redaksiya və ya fərdi tövsiyələrdən avtomatik olaraq çıxarılacaq. Bu barədə avqustun 11-də, çərşənbə axşamı Spotify-ın mətbuat xidməti məlumat yayıb.
Spotify əlavə edib ki, hər bir ifaçının musiqi yaratmaq üçün süni intellektdən istifadə etdiyini bildirmək imkanı olacaq. Lakin şirkət yalnız könüllü bildirişlərə arxalanmayacaq və bütün musiqiçi profillərini xüsusi alqoritmlər vasitəsilə yoxlayacaq. Nəticədə, istifadəçilər sənətçinin süni intellekt məzmunu yaydığını özünün bildirdiyini, yoxsa bu qənaətə profilin təhlilindən sonra gəlindiyini görə biləcəklər.
Avqustun 2-də Avropa İttifaqında süni intellekt vasitəsilə yaradılmış məzmunun açıq şəkildə markalanması tələbi qüvvəyə minib. Bu tələb Aİ-nin süni intellekt sahəsini tənzimləyən ilk kompleks qanunu olan "Aİ-nin Süni İntellekt haqqında Qanunu"nun (AI Act) bir hissəsidir.
Avropa Komissiyasının izahına görə, artıq süni intellekt sistemlərinin təchizatçıları və tərtibatçıları süni intellekt vasitəsilə yaradılmış məzmunu müəyyən nişanlarla aydın və görünən şəkildə qeyd etməlidirlər. Bu, məsələn, real insanlara, obyektlərə, yerlərə, varlıqlara və ya hadisələrə bənzəyən şəkillərə, audio və video məzmunlara, habelə "ictimai maraq kəsb edən məsələlər haqqında ictimaiyyəti məlumatlandırmaq üçün ilkin yoxlama və ya redaksiya nəzarəti olmadan dərc olunan" mətnlərə şamil edilir.
Almaz Həsənli
