Polşa məhkəməsi Baş nazir Tuska sui-qəsd cəhdi planlaşdırmaqda şübhəli bilinən bir nəfəri həbs edib

Polşadakı Varşava-Mokotuv Rayon Məhkəməsi Baş nazir Donald Tuska sui-qəsd cəhdi planlaşdırmaqda şübhəli bilinən 66 yaşlı kişinin iki aylıq müvəqqəti həbsinə qərar verib. Məhkəmə prokurorun tələbini təmin edib. Oxuməni.az xəbər verir ki, bu barədə RMF24 məlumat yayıb.

Çərşənbə axşamı kişiyə dövlət hakimiyyətini zorla devirmək də daxil olmaqla doqquz maddə ilə ittiham irəli sürülüb. Nəşrin məlumatına görə, onu iki ildən 15 ilə qədər həbs cəzası gözləyir.

RMF24 tərəfindən Kşiştof N. kimi tanınan şübhəli bazar günü saxlanılıb. Onun evində axtarış Dövlət Mühafizə Xidmətinin əməkdaşları tərəfindən polislə birgə aparılıb.

Axtarış zamanı hüquq-mühafizə orqanlarının əməkdaşları ilkin tapıntılara görə, qəlpə qumbaralarına bənzəyən ondan çox əldəqayırma partlayıcı qurğu müsadirə ediblər. Varşava Rayon Prokurorluğunun sözçüsü Pyotr Antoni Skiba bildirib ki, fişənglərdən birində metal kürəciklər tapılıb və bu da potensial təhlükəni artırır.

Mənzildə silaha bənzər əşyalar da tapılıb. Bunlar əvvəlcədən alovlu silahlar və ya pnevmatik silahlar kimi təsnif edilib. Müstəntiqlər kompüter avadanlıqlarını və 66 yaşlı kişi ilə əlaqədə olan insanların siyahısını müsadirə ediblər.

Prokurorluğun məlumatına görə, şübhəli internetdə Polşada hakimiyyətin zorakılıqla ələ keçirilməsini, təcavüzkar müharibəni və milli, etnik, irqi və siyasi zəmində cinayətlərə çağırışları təbliğ edən materiallar dərc edib. Bu materialların bəziləri həbsindən sonra internetdən silinib.

Prokurorluğun məlumatına görə, kişi bir neçə bölmədən ibarət radikal qrup yaratmağa cəhd edib. Hazırda hüquq-mühafizə orqanları onun hərəkətlərinin xarici kəşfiyyat orqanlarından ilhamlandığına dair heç bir əlamət görmür, lakin bu barədə araşdırma aparılır. Dindirmə zamanı şübhəli günahını boynuna almayıb və heç bir izahat verməkdən imtina edib.

Bazar günü polisə Donald Tusk və Baş nazirin müavini Vladislav Kosyniak-Kamışa qarşı mümkün sui-qəsd cəhdi barədə məlumat daxil olub. Bundan sonra Daxili Təhlükəsizlik Agentliyinin Terrorla Mübarizə Mərkəzində polis, Dövlət Mühafizə Xidməti və agentliyin nümayəndələri arasında görüş keçirilib.

Əziz Mustafa