Qan şəkərini aşağı salmaq üçün yeni təbii vasitə tapılıb

Çinli alimlər müəyyən ediblər ki, fruktooligosaxaridlərin (FOS) və çaytikanının (oblepixa) birləşməsi qan şəkərini aşağı sala və lipid mübadiləsinin göstəricilərini yaxşılaşdıra bilər. Oxuməni.az xəbər verir ki, tədqiqatın nəticələri "Food & Function" (F&F) jurnalında dərc olunub.

Tədqiqat, orqanizmin insulin hormonundan səmərəli istifadə etmədiyi xəstəlik olan ikinci tip şəkərli diabeti olan siçanlar üzərində aparılıb. Bu, qanda qlükozanın səviyyəsinin artmasına, nəticədə isə orqanların və toxumaların zədələnməsinə səbəb olur.

Əlavə qəbul edildikdən sonra heyvanlarda acqarına qan şəkəri səviyyəsi aşağı düşüb, qanda isə ürək-damar xəstəlikləri riskinə bağlı olan triqliseridlərin və "pis" xolesterinin (aşağı sıxlıqlı lipoproteinlər) konsentrasiyası azalıb.

Alimlərin sözlərinə görə, fruktooligosaxaridləri prebiotiklərdir, yəni mədədə həzm olunmayan, lakin bağırsağın faydalı bakteriyaları üçün "qidalanma" mənbəyi olan maddələrdir. Çaytikanında isə bioloji aktiv birləşmələr - vitaminlər, antioksidantlar və yağ turşuları var.

"Effekt bir neçə mexanizmlə əlaqəlidir. Birincisi, bağırsaq mikrobiotasının - bağırsaqda yaşayan mikroorqanizmlər topluluğunun tərkibi dəyişdi. Maddələr mübadiləsinin normallaşması ilə əlaqəli olan Bifidobacterium və Akkermansia kimi faydalı bakteriyaların sayı artdı və iltihaba səbəb olan bakteriyaların sayı azaldı", - tədqiqatçılar qeyd edirlər.

Əlavə, öd turşularının mübadiləsini də normallaşdırdı - bu maddələr qaraciyərdə istehsal olunur və yalnız yağların həzmində deyil, həm də qanda şəkər və lipid səviyyələrinin tənzimlənməsində iştirak edir. Bundan əlavə, heyvanlarda metabolik pozğunluqları tez-tez müşayiət edən və diabetin gedişatını ağırlaşdıran iltihab əlamətləri zəiflədi.

Müəlliflər vurğulayırlar ki, hələlik bu, heyvanlar üzərində aparılan bir təcrübədir, lakin əldə olunan məlumatlar prebiotiklərin və bitki komponentlərinin diabetin profilaktikası və əlavə korreksiyası üçün əsas kimi birləşdirilməsinin perspektivli olduğunu göstərir.

Almaz Həsənli