Yaponiyada işçilər süni intellektdən istifadə etməklə həftədə iş vaxtlarını 110 dəqiqə azaldıblar

Yaponiyada nazirliklərin və dövlət qurumlarının işçiləri Gennai generativ süni intellekt platforması sayəsində iş vaxtlarını həftədə orta hesabla 110 dəqiqə azaltmışlar.

Oxuməni.az xəbər verir ki, bu barədə The Japan Times qəzetinin məlumatında deyilir. Məlumata görə, bu, Rəqəmsal Texnologiyalar Agentliyi tərəfindən aparılan sorğuda aşkar edilib.

Onlayn sorğu avqust və sentyabr aylarında nazirliklərin və qurumların işçiləri arasında aparılıb. Agentlik 6439 etibarlı cavab alıb. Respondentlərin yarıdan çoxu platformadan istifadə sayəsində iş vaxtlarını həftədə ən azı bir saat azaltdıqlarını bildirib.

Xüsusilə, respondentlərin 35,1%-i iş vaxtlarını həftədə bir-üç saat azaltdıqlarını bildirib. Digər 10,9%-i üç-beş saat, 5,2%-i beş-on saat, 3,2%-i isə on saat və ya daha çox qənaət edib. Bu arada, respondentlərin 34,6%-i iş saatlarının faktiki olaraq dəyişməz qaldığını bildirib.

İşçilər platformanın üstünlüklərini tez bir zamanda qaralamalar yaratmaq, böyük sənəd həcmlərində müvafiq məlumatları tapmaq və texniki bilikləri daha tez mənimsəmək kimi qeyd ediblər.

Sorğuda iştirak edənlərin 10,4%-i Gennai-dən demək olar ki, hər gün, 11%-i həftədə üç-dörd dəfə, 26,4%-i isə həftədə bir-iki dəfə istifadə edir. Respondentlərin digər 31,2%-i platformadan nadir hallarda və ya heç istifadə etmir.

Gennai Rəqəmsal Texnologiyalar Agentliyi tərəfindən hazırlanıb və idarə olunur. Platforma təxminən 180.000 Yaponiya hökumət işçisi üçün əlçatandır və eyni zamanda iki və ya daha çox işi müstəqil şəkildə yerinə yetirə bilən süni intellekt agentinə malikdir.

Əziz Mustafa