Gündə səkkiz stəkan su içmək lazımdırmı?
Sübutlara əsaslanan tibbdə ifrat yanaşmalardan qaçmaq vacibdir: hamı üçün universal norma yoxdur və suya olan tələbat insan və vəziyyətdən asılı olaraq əhəmiyyətli dərəcədə dəyişir. Oxuməni az xəbər verir ki, bu barədə “Gazeta.Ru”ya “Atribut” klinikasının həkim-qastroenteroloqu Mariya Şamanskaya bildirib.
“Gündə, məsələn, səkkiz stəkan su içmək kimi sərt tövsiyələr yoxdur. Nə qədər su içmək bədən çəkisindən, yaşdan, fiziki aktivlikdən, iqlimdən, qidalanmadan, eləcə də tərləmə, qızdırma, ishal və qusma zamanı maye itkisi kimi əlavə amillərdən asılıdır. Yetkinlər üçün əlverişli bir istiqamət kimi çox vaxt sutkada bədən çəkisinin hər kiloqramına 30 ml hesablanır. Məsələn, 60 kq çəki olduqda bu, təxminən 1,8 litr, 70 kq-da 2,1 litr, 80 kq-da isə təxminən 2,4 litr maye deməkdir. Lakin bu, məhz istiqamətverici göstəricidir, sərt qayda deyil: müxtəlif insanların suya olan tələbatı fərqli ola bilər, isti havada və fiziki yük zamanı isə bu tələbat artır”, – deyə həkim izah edib.
Həkimin sözlərinə görə, su balansı yalnız adi sudan ibarət deyil. Çay, qəhvə, şorba, süd, süd məhsullarından hazırlanan içkilər, kompot və digər mayelər də orqanizmin ümumi su qəbuluna töhfə verir. Mayenin bir hissəsi tərəvəz, meyvə və şorba kimi qida məhsulları vasitəsilə də qəbul edilir.
“Bunu düzgün başa düşmək vacibdir: bu içkilər orqanizmin ümumi su balansını təmin edə bilər, lakin əsas və fizioloji baxımdan ən uyğun maye mənbəyi olan suyu əvəz etmir. Suyun tərkibində şəkər, kofein və əlavə kalori yoxdur, buna görə də gündəlik içki üçün əsas seçim olaraq qalır. Çay, qəhvə və şorbanı ümumi maye miqdarında nəzərə almaq olar, lakin şirin içkilər, paketlənmiş şirələr və alkoqolu suyun tam əvəzi hesab etmək olmaz”, – deyə həkim bildirib.
Maye çatışmazlığının dolayı əlamətlərinə sidiyə az çıxma, sidiyin rənginin tündləşməsi, ağızda quruluq, baş ağrısı, halsızlıq, diqqətin azalması, qəbizliyə meyillilik və digər əlamətlər daxildir.
Almaz Həsənli
