BMT Ukrayna münaqişəsinin həllində iştirak etməyə hazırdır

BMT Ukraynadakı münaqişənin həlli üçün istənilən səyləri alqışlayır və tələb olunarsa, bu prosesdə rol oynamağa hazırdır. Bunu jurnalistlərə BMT baş katibinin mətbuat katibinin müavini Fərhan Haq Rusiya Federasiyası və ABŞ prezidentləri Vladimir Putin və Donald Tramp arasında telefon danışığını şərh edərkən deyib.

"Əlbəttə, biz Ukraynadakı müharibənin həlli istiqamətində həm Rusiya, həm də Ukrayna tərəfini cəlb edəcək istənilən səyləri alqışlayardıq. Bu baxımdan, aydındır ki, hər iki tərəf prosesdə iştiraka hazırdırsa, bu, müsbət hal olacaq. Biz hansı rolu oynayacağımızı görməliyik", - deyə o vurğulayıb.

"Birləşmiş Ştatlar və Rusiya Federasiyası arasında münasibətlərin vacibliyini nəzərə alaraq, BMT problemlərin müntəzəm təmaslar vasitəsilə həllinə yönəlmiş istənilən səyləri alqışlayır. Beləliklə, təbii ki, bu, müsbət haldır", - deyə Haq bildirib.

Bundan əvvəl Rusiya və ABŞ prezidentləri Vladimir Putin və Donald Tramp arasında telefon danışığı olub. Rusiya prezidentinin mətbuat katibi Dmitri Peskov bildirib ki, “bu, çox uzun telefon danışığı olub, demək olar ki, bir saat yarım davam edib”.

Əziz Mustafa, Oxuməni.az