Əfqanıstan, Birma, Çad, Konqo, Ekvatorial Qvineya, Eritreya, Haiti, İran, Liviya, Somali, Sudan və Yəmən vətəndaşları ABŞ-a buraxılmayacaq

ABŞ prezidenti Donald Tramp terrorizm və qeyri-qanuni miqrasiya ilə mübarizə tədbirləri çərçivəsində 12 ölkə vətəndaşlarının ölkəyə girişini qadağan edən sərəncam imzalayıb. Bu barədə Ağ Evin mətbuat xidməti məlumat yayıb.

Qadağaya Əfqanıstan, Birma, Çad, Konqo, Ekvatorial Qvineya, Eritreya, Haiti, İran, Liviya, Somali, Sudan və Yəmən vətəndaşları daxildir. Burundi, Kuba, Laos, Syerra-Leone, Toqo, Türkmənistan və Venesuela vətəndaşlarına da qismən məhdudiyyət qoyulub.

“Biz müəyyən şəxslər üçün səyahət qadağasını bərpa edəcəyik və radikal islamçı terrorçuların ölkəmizə daxil olmasının qarşısını alacağıq, bu qərar artıq Ali Məhkəmə tərəfindən qüvvədə saxlanılıb”, - Tramp bildirib.

Qətnamənin mətninə əsasən, məhdudiyyətlərin tətbiq edilməsinin əsas səbəbləri arasında müxtəlif ölkələrin vətəndaşları tərəfindən istifadə müddətinin bitmiş vizaları, ayrı-ayrı dövlətlərin terrorizmi dəstəkləyən dövlətlər siyahısına salınması, pasport və ya digər mülki sənədlərin verilməsi üzrə səlahiyyətli mərkəzi orqanın olmaması və sair daxildir.

İstisnalar ikili vətəndaşlığı olan şəxslər, Əfqanıstandan xüsusi viza, diplomatik vizalar, BMT və ya NATO vizaları, habelə idmançılar üçün olacaq.

Əziz Mustafa, Oxuməni.az