Berk Albayrak Yeni Daşkənd Beynəlxalq Hava Limanı tikinti layihəsi ofisinin baş meneceri təyin edilib

Türkiyədən Berk Albayrak Yeni Daşkənd Beynəlxalq Hava Limanı tikinti layihəsi ofisinin baş meneceri təyin edilib. O, İstanbulun Sabiha Gökçen Hava Limanının baş direktoru və Küveytin Yeni Hava Limanının tikintisi üzrə layihə direktoru vəzifələrində çalışıb. Albayrak, bu barədə LinkedIn səhifəsində məlumat verib.

"Bu vacib layihənin inkişafına töhfə verməyi və böyük uğurlar qazanmaq üçün bütün maraqlı tərəflərlə işləməyi səbirsizliklə gözləyirəm", - deyə o yazıb.

Berk Albayrak əvvəllər Avropanın dördüncü ən böyük hava limanı hesab edilən İstanbulun Sabiha Gökçen Hava Limanının baş direktoru və Küveytin Yeni Hava Limanının tikintisi üzrə layihə direktoru vəzifələrində çalışıb.

"Haber.Aero"nun məlumatına görə, Berk Albayrak 1970-ci ildə Ankarada anadan olub. O, 1993-cü ildə Ankaradakı Yaxın Şərq Texniki Universitetinin (ODTU) İnşaat Mühəndisliyi fakültəsini bitirib. O, həmçinin 1995-ci ildə həmin universitetdən magistr dərəcəsi alıb.

Özəl sektorda çalışdıqdan sonra Türkiyə Nəqliyyat Nazirliyinin Hava Limanları İdarəsinin (DHMI) Baş Müdirliyinə qoşulub və orada 10 il çalışıb. Daha sonra Limak şirkətinin Sabiha Gökçen Hava Limanı layihəsinə qoşulub və orada 16 il menecer, direktor və baş menecer müavini vəzifələrində çalışıb və hazırda hava limanının baş meneceridir.

2025-ci ilin əvvəlində o, həmçinin Limak tərəfindən həyata keçirilən 5,5 milyard dollarlıq yeni Küveyt Hava Limanı layihəsinin layihə direktoru təyin edilib. Layihənin başa çatması 2026-cı ilə planlaşdırılır.

Yeni Daşkənd Beynəlxalq Aeroportu Daşkənd bölgəsində, Urtaçirçik və Kuyiçirçik rayonlarında 1300 hektar ərazidə inşa ediləcək. Özbəkistan Prezidenti Şavkat Mirziyoyev tikinti işlərinə 2025-ci ilin oktyabr ayında başlayıb.

Yeni hava limanının tikintisi qərarı paytaxta sərnişin axınının son səkkiz ildə üç dəfə artaraq ildə 9 milyon nəfərə çatması və 2040-cı ilə qədər 24 milyonu keçəcəyi gözlənilir. Mövcud hava limanı 11 milyon sərnişini qəbul etmək üçün nəzərdə tutulub və şəhər hüdudlarında yerləşir.

Layihə dövlət-özəl tərəfdaşlığı çərçivəsində həyata keçiriləcək. Özəl tərəfdaşlar arasında Vision Invest (Səudiyyə Ərəbistanı), layihəyə "on milyardlarla yen" investisiya qoyacaq Sojitz Trading House (Yaponiya) və İnçxon Beynəlxalq Aeroport Korporasiyası (Koreya Respublikası) olacaq.

Layihə dörd mərhələdə layihələndirilib. 2,5 milyard dollara başa gələn birinci mərhələ hava limanı terminalının və aerodromun tikintisini əhatə edəcək.

Tikintisi başa çatdıqdan sonra hava limanı ildə 20 milyona qədər sərnişin və 129.000 ton yük daşıya, saatda 30-a qədər uçuş və eniş edə biləcək və eyni zamanda 62 təyyarəni qəbul edə biləcək.

Yeni hava limanı kompleksi birbaşa Daşkənd-Səmərqənd, Daşkənd-Əndican və Daşkənd-Bostanlıq avtomobil yollarına birləşdiriləcək. Həmçinin yüksək sürətli qatar xidməti göstərən dəmir yolu stansiyası tikiləcək və Daşkənd ilə Yeni Daşkənd mərkəzləri arasında servis xidməti yaradılacaq.

Əziz MUSTAFA