HƏMAS sağ qalan 13 israilli girovu da azad etdi
Fələstinin Həmas qruplaşması 20 israilli girovu Qırmızı Xaç Cəmiyyətinə təhvil verib. Bu barədə “Ynet” də daxil olmaqla media orqanları məlumat yayıb və daha sonra İsrail Müdafiə Qüvvələri (IDF) tərəfindən təsdiqlənib.
Yerli vaxtla səhər saat 8:00-da (Bakı vaxtı ilə 9:00 ) Alon Ohel, Matan Angrest, Eytan Mor, Qali və Ziv Bermanlar, Omri Miran və Qay Gilboa-Dallal sərbəst buraxılıb. Qırmızı Xaç onları İDF və Şin Bet rəsmilərinə təhvil verib, onlar da keçmiş əsirləri İsrailə daşıyıblar.
Səhər saat 10:00-dan (Bakı vaxtı ilə 11:00 ) sonra HƏMAS daha 13 əsiri Qırmızı Xaç Cəmiyyətinə təhvil verib. Onların arasında Rom Breslavski, Bar Kuperşteyn, Nimrod Koen, Evyatar David, Elkana Buxbut, Segev Kalfon, Avinatan Or, Yosef Haim Ohana, Maksim Harkin, Eytan Horn, Matan Zanqauker, David Kuno və Ariel Kuno da var idi. “Ynet” qeyd edib ki, qrupun daha canlı girovları yoxdur.
Bundan əvvəl HƏMAS bu gün azad ediləcək 20 yaşayan israillinin siyahısını dərc edib. Yaraqlılardan həmçinin 26 ölü əsirin cəsədini İsrailə təhvil vermələri tələb olunur.
Bunun müqabilində İsrail ömürlük həbs cəzası çəkən təqribən 250 fələstinlini, həmçinin 2023-cü il oktyabrın 7-də HƏMAS hücumundan sonra saxlanılan daha 1700 qəzzalı azad etməlidir.
“Reuters” xəbər verir ki, 1966 nəfərin hamısı artıq avtobuslara minib. Agentliyin mənbələrinə görə, 1716 fələstinli Qəzza zolağında Nasser xəstəxanası yaxınlığında, daha 250 nəfər İordan çayının qərb sahilinə və digər ölkələrə köçürüləcək.
Bundan əlavə, sülh sazişinin birinci mərhələsi çərçivəsində İsrail Qəzzada atəşi dayandırıb və qoşunlarını yeni mövqelərə geri çəkib. Hər iki tərəf oktyabrın 9-da ABŞ prezidenti Donald Trampın təklif etdiyi sazişi imzalayıb.
Təl-Əvivin ictimai çimərliyində ABŞ prezidenti Donald Trampa təşəkkür edən lövhə də peyda olub. Media xəbərləri bildirir ki, Ağ Ev onun təyyarəsinin pəncərəsindən mesajı görüb.
Tramp girovların ailələri ilə görüşmək və Knessetdə çıxış etmək üçün bu gün İsrailə gəlib. Daha sonra ABŞ prezidenti Misirə gedəcək və orada Qəzza sammitində iştirak edəcək.
Təl-Əviv sakinləri şəhərin mərkəzindəki “Girovlar Meydanı”na toplaşaraq girovların azad edilməsini qeyd edir və xəbər gözləyirlər. Bir çox israilli əllərində bayraqlar və əsirlərin portretləri olub.
Almaz Həsənli
