Tramp BBC-dən ən azı 10 milyard dollar tələb edir

ABŞ prezidenti Donald Tramp süni intellekt və digər texnologiyalardan istifadə edərək sözlərini təhrif etdiyinə görə Britaniya Yayım Korporasiyası BBC-dən ən azı 10 milyard dollar tələb edir. Bu, Amerika liderinin Florida ştatının Cənub Dairəsi üzrə federal məhkəmədə qaldırdığı iddiadan irəli gəlir.
Məhkəmənin onlayn məlumat bazasında dərc olunmuş sənədə görə, iddiaçı BBC-ni iki maddədə ittiham edir: böhtan və Florida ştatının "aldadıcı və ədalətsiz ticarət təcrübələri" qanununu pozmaq. Hər bir ittiham üzrə Amerika lideri "ən azı 5 milyard dollar məbləğində, üstəgəl faiz, xərclər, cərimələr, vəkil haqları və məhkəmənin ədalətli və düzgün hesab etdiyi digər güzəştlər" tələb edir.

İddia ərizəsində iddia olunur ki, BBC-nin Trampın 6 yanvar 2021-ci il tarixli çıxışının hissələrini redaktə etməkdəki hərəkətləri qəsdən və pis niyyətli olub və nəticələrin Amerika liderinə zərər vurmaqda davam etdiyi bildirilir. Trampın vəkilləri həmçinin münsiflər heyətinin məhkəməsini tələb edirlər.

İddia ərizəsi BBC tərəfindən 2024-cü ilin oktyabrında yayımlanan verilişlə bağlıdır. Orada Trampın çıxışı onun tərəfdarlarını ABŞ Kapitoli binasını ələ keçirməyə çağırdığını göstərmək üçün redaktə edilib, halbuki əslində prezident vətəndaş mövqelərini dinc vasitələrlə ifadə etməyin zəruriliyindən danışırdı. Qalmaqal nəticəsində BBC-nin baş direktoru Tim Deyvi və korporasiyanın xəbərlər rəhbəri Deborah Turness istefa veriblər.

Tramp əvvəllər tanınmış media korporasiyalarına qarşı çoxsaylı məhkəmə işlərində iştirak edib. O, müxtəlif vaxtlarda CNN, ABC News və CBS News, eləcə də The Wall Street Journal və The New York Times-a qarşı məhkəmə iddiaları qaldırıb.

Əziz MUSTAFA