Norveç Kiyevə dronlar və pilotsuz sistemlər üçün 1,2 milyard dollar ayıracaq

Norveç 2026-cı ildə Kiyevə dron və muxtar sistemlərin alınması üçün 1,2 milyard dollar ayıracaq. Bu, ümumi 8,5 milyard dollarlıq yardım paketinin ən böyük xərc maddəsi olacaq. Bu barədə hökumətin mətbuat xidməti məlumat verib.

Məbləğin əsas hissəsi - 7 milyard dollar - hərbi yardım şəklində təmin ediləcək, qalan 1,5 milyard dollar isə mülki məqsədlər üçün ayrılacaq.

"Ukraynalılar nəyə ehtiyac duyduqlarını ən yaxşı bilirlər. Ukrayna hakimiyyəti ilə fəal məsləhətləşmələrdən sonra hökumət artıq 2026-cı ildə hərbi yardımın ayrılması barədə qərar verib. Vəsaitlər Ukrayna üçün ən böyük təsir göstərəcək sahələrə yönəldiləcək", - deyə mətbuat xidməti çərşənbə axşamı Ukraynaya səfərə yola düşən Baş nazir Yonas Qar Stördən sitat gətirib.

Pilotsuz təyyarələr və muxtar sistemlərlə yanaşı, hərbi hissədə üstünlük hava hücumundan müdafiə sistemlərinə, artilleriya sursatlarına və Ukrayna qoşunlarının təlim və təhsilinə veriləcək. Bu məqsədlər üçün ümumi xərclər 4 milyard dollardan çox olacaq. Baş nazir izah etdi ki, tərəflər zəruri hallarda bu planları dəyişdirə biləcəklər.

Əziz MUSTAFA