Fransa Rafale müqaviləsi müqabilində Yunanıstana 43 qırıcı təyyarəsini Ukraynaya verməsini təklif edə bilər

Fransa, Yunanıstana 43 ədəd "Mirage 2000" qırıcı təyyarəsini və onların ehtiyat hissələrini Ukraynaya təhvil verməyi təklif etməyi planlaşdırır. Bunun müqabilində isə Afina "Rafale" təyyarələrinin alınması üçün sərfəli şərtlər əldə edə bilər. Bu barədə Oxuməni.az "Le Figaro" nəşrinə istinadən məlumat yayıb.
Fransa prezidenti Emmanuel Makron cümə günü Yunanıstana səfər edəcək və böyük ehtimalla Yunanıstanın bütün 43 ədəd "Mirage 2000" təyyarəsini və onların ehtiyat hissələrini endirimli qiymətlə "Rafale" təyyarələri ilə dəyişdirməyi təklif edəcək. Müdafiə və xarici siyasət məsələləri üzrə ixtisaslaşmış yunan nəşri "Estia"nın məlumatına görə, Makron bu təklifi aprelin 24-25-də Yunanıstana səfəri zamanı təqdim etməlidir.
Söhbət 24 ədəd "Mirage 2000-5" və 19 ədəd daha köhnə "Mirage 2000 EGM/BGM" təyyarəsindən gedir. Köhnə versiyalar artıq istismardan çıxarıldığı üçün onların hamısının döyüş qabiliyyətli olub-olmadığı şübhəlidir.
Fransa tərəfi endirimli qiymətlə "Rafale" qırıcı təyyarələrinin "oxşar sayda" tədarükünü təklif edəcək. Razılaşmanın konkret şərtləri və avadanlığın dəqiq qiyməti danışıqlar zamanı hər iki tərəf tərəfindən razılaşdırılmalıdır.
"Mirage" təyyarələrinin "Rafale" ilə dəyişdirilməsi, Yunanıstanın 114-cü qırıcı eskadronunun ümumilikdə 36 ədəd "Rafale" təyyarəsi ilə iki eskadronu tam təchiz etməsinə imkan verəcək.
Xatırladaq ki, yanvar ayının sonunda prezident Vladimir Zelenski, Fransa həmkarı Makronla apardığı danışıqdan sonra bildirmişdi ki, Fransa bu il Ukraynaya əlavə təyyarələr tədarük edəcək.
Almaz Həsənli