Əl-Qaidə yaraqlıları Malinin müdafiə nazirini iqamətgahında öldürüblər

Malinin müdafiə naziri general Sadio Kamara ölkə daxilində hərbi obyektlərə qarşı genişmiqyaslı koordinasiyalı hücumda öldürüldü. Bu barədə Əl-Cəzirə məlumat verib.
Nəşrin mənbələrinə görə, general Kamaranın paytaxt Bamakodan 15 kilometr aralıda yerləşən Kati qarnizon şəhərindəki iqamətgahı avtomobil bombası ilə hücumun hədəfi olub.

Hücum, Əzavadın Azadlığı Cəbhəsinin Tuareq üsyançıları ilə birlikdə Camaat Nusrat əl-İslam vəl-Müslimani (Əl-Qaidə filialı) yaraqlıları tərəfindən həyata keçirilib.

Sadio Kamara 2020 və 2021-ci illərdəki çevrilişlərdən sonra hakimiyyətə gələn Malinin hərbi rəhbərliyindəki ən nüfuzlu şəxslərdən biri hesab olunurdu.

Analitiklər onu rejimin əsas sütunu və ölkənin ehtimal olunan gələcək lideri adlandırdılar. Onun ölümü Malinin silahlı qüvvələrinə ciddi zərbə hesab olunur.
Əl-Cəzirənin məlumatına görə, hücumlar eyni vaxtda bir neçə bölgədə - paytaxt Bamakoda, şimaldakı Gao və Kidal şəhərlərində və ölkənin mərkəzindəki Sevaredə baş verib.

Bazar günü etibarilə Kidalda silah səsləri və partlayışlar hələ də davam edirdi. Ölkənin müvəqqəti prezidenti Assimi Qoyta zərər görməyib və təhlükəsiz yerə köçürülüb.

Ekspertlər qeyd edirlər ki, əvvəllər düşmənçilik edən qruplar - islamçılar və tuareqlər - dövlətə qarşı mübarizə aparmaq üçün birləşiblər. Afrika Birliyi və ABŞ nümayəndələri artıq bu hücumları rəsmi olaraq pisləyiblər.

Əziz MUSTAFA