Entoni Hopkins 88 yaşında "Life Is a Dream" adlı musiqi albomunu buraxacaq

Britaniyalı aktyor Entoni Hopkins "Decca Classics" səsyazma studiyası ilə müqavilə imzalayıb: avqustun 21-də o, öz bəstələrindən ibarət ilk rəsmi albomunu təqdim edəcək. "Life Is a Dream" (Həyat bir yuxudur) adlanan alboma 88 yaşlı aktyorun 60 ildən çox müddətdə üzərində işlədiyi kompozisiyalar daxil olacaq. Oxuməni.az xəbər verir ki, bu barədə "Variety" məlumat yayıb.

Entoni Hopkins dörd yaşından fortepianoda ifa edir. O, hələ uşaqlıq illərində Bethoven və Şopenin əsərlərini ifa edib, yeniyetməlik dövründə isə tamaşalar üçün musiqi bəstələməyə başlayıb.

"Musiqi mənim ilk istəyim, ilk arzum olub. Mən bütün ömrüm boyu musiqi bəstələmişəm. Bu əsərlərin bəziləri onilliklərdir ki, mənim içimdə yaşayır və mən hələ də onlara qayıdıram", - deyə aktyor qeyd edib.

Yeni albomda Entoni Hopkinsin əsərlərini venesuelalı dirijor Qustavo Dudamelin rəhbərliyi ilə Filarmoniya orkestri ifa edib. Albomun "Bracken Road" adlı ilk sinqlı artıq işıq üzü görüb – reliz cümə günü baş tutub. Leyblin məlumatına görə, bu kompozisiya Hopkinsin Cənubi Uelsin Marqem şəhəri ilə bağlı uşaqlıq xatirələrindən ilhamlanıb. Bəstəkar burada 1940-cı illərdə ailəsinin evini əhatə edən küçələrin, çəmənliklərin, tarlaların və dağların nostalji mənzərəsini yaradıb.

Entoni Hopkins özü öyrənmiş bəstəkardır. 2012-ci ildə o, hollandiyalı skripkaçı Andre Ryonun "And the Waltz Goes On" albomunun yaradılmasındakı töhfəsinə görə "Classic Brit Award" mükafatının "İlin albomu" kateqoriyasında qalibi olub. 2025-ci ildə o, Səudiyyə Ərəbistanındakı konsertdə "Life Is a Dream" əsərini ilk dəfə canlı ifa edib. Əsəri Böyük Britaniyanın Kral Filarmoniya Orkestri ifa edib.

Hopkins "Decca" ilə müqavilə imzalamağı "ömür boyu dəyər verəcəyi bir şərəf" adlandırıb. Aktyor "Filarmoniya" orkestri və onun virtuoz solistləri – violonçel ifaçısı Qreqorio Nieto və pianoçu Serxio Tempo ilə əməkdaşlıq etməyin onun üçün böyük şərəf olduğunu vurğulayıb. O, həmçinin dirijor Qustavo Dudamelə minnətdarlığını bildirib: "O, dirijor çubuğunun zərif hərəkəti ilə hər bir nota dərin və silinməz məna qataraq, dinləyicini dərindən şəxsi bir şeyi hiss etməyə və təsəvvür etməyə vadar edən mənzərəli bir mənzərə yaratdı."

Dudamel özü də Hopkinsi istedadı tək bir sənət formasının sərhədlərini aşan nadir sənətkarlardan biri adlandırıb. Dirijor qeyd edib ki, Hopkinsin film və səhnədəki işlərini fərqləndirən təxəyyül dərinliyi və emosional həqiqət onun musiqisində də mövcuddur.

Uelsli Entoni Hopkins "Quzuların Səssizliyi" filmindəki Dr. Hannibal Lekter rolu ilə tanınır. Filmdəki performansı ona "Ən Yaxşı Aktyor" nominasiyasında Oskar mükafatı qazandırıb.

Almaz Həsənli