Aralıq seçkilərində məğlub olacağı təqdirdə, Tramp ABŞ-ı Konqressiz idarə etmək niyyətindədir

ABŞ Prezidenti Donald Trampın administrasiyası 3 noyabrda keçiriləcək ara seçkilərində məğlub olacağı təqdirdə ölkəni Konqressiz idarə etmək planı hazırlayır.

Oxuməni.az xəbər verir ki, bu barədə Reuters məlumat yayıb.

Ağ Ev rəsmisi və iki mənbəyə görə, Tramp administrasiyası bir neçə aydır ki, Konqresin Demokratik nəzarətə mümkün keçidi üçün hazırlıq görür.

Reuters-in məlumatına görə, yüksək vəzifəli şəxslər aprel ayından bəri Ağ Evin hüquq komandası ilə birlikdə Trampın Konqresin təsdiqi olmadan edə biləcəyi immiqrasiya, tariflər, mənzil xərcləri və federal xərclər üzrə icra tədbirlərini müəyyən etmək üçün çalışırlar.
Bir mənbə bildirib ki, Ağ Evin vəkili Uill Şarf və onun komandası da "Trampın qanuni olaraq təkbaşına nə edə biləcəyini, səlahiyyətlərini harada aşa biləcəyini və bu qərarları məhkəmədə necə müdafiə edəcəyini" araşdırırlar.

Agentlik yazır ki, planlaşdırma 3 noyabr çərşənbə axşamı keçiriləcək qarşıdan gələn seçkilərin paradoksunu vurğulayır.

Əsas məsələ budur ki, Demokratlar Konqres üzərində nəzarəti ələ keçirsələr, Trampı araşdıra, qanunvericiliyi bloklaya və onun xərcləmə prioritetlərini məhdudlaşdıra biləcəklər. Buna baxmayaraq, Tramp ticarət, xarici siyasət və ikinci müddətində aktiv şəkildə istifadə etdiyi federal bürokratiya üzərində geniş icra səlahiyyətlərini saxlayacaq.
ABŞ prezidentinin özü artıq bildirib ki, Respublikaçılar Konqres üzərində nəzarəti itirərsə, Demokratlarla kompromis əldə etməzdən əvvəl Nümayəndələr Palatasına "bir-iki ay" veto qoya bilər.

"Düşünürəm ki, mən "cənab Veto" olacağam və sonra, bir anda, yəqin ki, razılaşmalar əldə edəcəyik", - deyə ABŞ prezidenti New York Post qəzetinə verdiyi müsahibədə bildirib.

Agentlik əlavə edib ki, Demokratlar Respublikaçıların az çoxluğunu (218-ə qarşı 214 və 53-ə qarşı 47) aşmaq üçün Nümayəndələr Palatasında və ABŞ Senatında əlavə dörd yer qazanmalıdırlar. Sorğular Demokratların Nümayəndələr Palatasını geri alacağını göstərir.
Xatırladaq ki, bir həftə əvvəl Financial Times qəzeti ABŞ seçicilərinin Tramp administrasiyasındakı korrupsiyadan narahat olduqlarını bildirmişdi. Sorğuya görə, ABŞ prezidentinə dəstək korrupsiya, qiymətlərin artması və İranla müharibə fonunda azalır.

Mediada həmçinin Respublikaçılar Partiyası pis nəticə alsa, Trampın İrana qarşı genişmiqyaslı hərbi əməliyyata meylli ola biləcəyi barədə məlumatlar da yayılmışdı.

Əziz MUSTAFA