Rusiya Federasiyasının Krasnodar diyarında və bir sıra vilayətlərində partlayışlar və yanğınlar baş verib

Krasnodar diyarının Yeisk şəhərində hərbi düşərgə yaxınlığında partlayışlar baş verib. Partlayış səsləri Rostov, Voronej və Volqoqrad vilayətlərində də eşidilib.

Bu barədə Rusiya mətbuatında xəbər verilir.

Astra yazır ki, Yeysk sakinləri hərbi düşərgə yaxınlığında partlayışlar barədə məlumat veriblər. Nəşr xatırladıb ki, burada Rusiya Hərbi Dəniz Qüvvələrinin aerodromu, Rusiya Hərbi Dəniz Qüvvələrinin 859-cu Döyüş İstifadəsi və Hərbi Dəniz Aviasiyasının Uçuş Heyətinin Yenidən Hazırlanması Mərkəzi və Hərbi Dəniz Qüvvələrinin 190-cı Təlim Qarışıq Aviasiya Alayı yerləşir.

Telekanalın məlumatına görə, Rusiyanın hərbi ictimai səhifələri Volqoqrad, Tambov, Oryol, Lipetsk, Tula və Saratov vilayətlərində, həmçinin Kuban və Stavropolda enerji və hərbi obyektlər istiqamətində hücumdan yazır. Onların sözlərinə görə, hücumda ümumilikdə 70-150 pilotsuz təyyarə iştirak edir.

Krasnodar diyarının qubernatoru bildirib ki, Şerbinovski rayonunun Şabelskoye kəndində pilotsuz təyyarə ağaca çırpılıb və partlayıb. Partlayış dalğası yaxınlıqdakı evin pəncərə və qapılarını sındırıb, qəlpələri avtomobili zədələyib. Qubernatorun sözlərinə görə, insident nəticəsində xəsarət alan olmayıb.

Rostov vilayətinin qubernatoru bildirib ki, hava hücumundan müdafiə qüvvələri Azov vilayətində 4 PUA-nı məhv edib.

Həmçinin naməlum dronlar Voronej vilayətinə hücum edib. Region qubernatoru bir neçə pilotsuz təyyarənin vurulduğunu bildirdi. Yerli sakinlər SHOT-a bildiriblər ki, onlar ən azı 10 partlayış səsi eşitmişlər.

Qubernatorun sözlərinə görə, vurulan pilotsuz təyyarə Moskva prospektində yaşayış kompleksinə düşüb və yanğın baş verib.

Oxuməni.az