ABŞ-da “Signal” messencerindən sızma ilə bağlı araşdırma başlayıb

Pentaqonun Baş Müfəttişinin səlahiyyətlərini icra edən Stiven Stebbins müdafiə naziri Pit Heqset və digər rəsmilərin Yəmən husilərinə qarşı zərbələri müzakirə etdiyi “Siqnal” messencerində qrup çat istifadəsi ilə bağlı araşdırma elan edib.
Bu barədə “AFP” və “Bloomberg” məlumat yayıb.
Araşdırma Heqset və digər Müdafiə Departamenti əməkdaşlarının “dövlət işlərini həyata keçirmək üçün kommersiya mesajlaşma xidmətlərindən istifadə siyasət və prosedurlarına” nə dərəcədə əməl etdiyini müəyyən etmək məqsədi daşıyır,- Stebbins memorandumda bildirib. Memoranduma əsasən, “məlumatların təsnifatı və qeydlərin saxlanmasına dair tələblərə əməl olunması”nın yoxlanılacağı qeyd edilib.
İstintaq ABŞ Senatının Silahlı Qüvvələr Komitəsinin iki aparıcı üzvünün - respublikaçı və demokratın tələbi ilə başlayıb.
Xatırladaq ki,“The Atlantic” jurnalı keçən həftə xəbər vermişdi ki, onun baş redaktoru Ceffri Qoldberq təsadüfən Husilərə qarşı hava hücumlarını müzakirə edən “Signal”dakı qrup çatına əlavə edilib. Yazışmalara digərləri ilə yanaşı, Heqset və Milli Təhlükəsizlik Müşaviri Mayk Uolts da daxil olublar.
Almaz Həsənli