Rusiya ATƏT-in Minsk qrupunun buraxılmasını dəstəkləyib
Rusiya Azərbaycan və Ermənistanın ATƏT-in Minsk Qrupunun buraxılması ilə bağlı birgə qərarını dəstəkləyir. Oxuməni.az-ın RBK-ya istinadən verdiyi xəbərə görə, bunu Rusiyanın qurumdakı daimi nümayəndəsi Aleksandr Lukaşeviç deyib.
O, qrupun 2025-ci ilin dekabrına qədər nəhayət ləğv ediləcəyini vurğulayıb.
Lukaşeviç izah edib ki, üç institut - Minsk Qrupu, ATƏT-in fəaliyyətdə olan sədrinin şəxsi nümayəndəsinin vəzifəsi və yüksək səviyyəli planlaşdırma qrupu fəaliyyətini dayandıracaq.
"Tərəflərin onların saxlanmasının məqsədəuyğun olmaması ilə bağlı mövqeyini nəzərə alsaq, onların dağılmasının qarşısını almaq üçün heç bir səbəb görmürük", - rusiyalı diplomat deyib.
Bundan əlavə, Rusiyanın daimi nümayəndəsi ATƏT-in Minsk Qrupunun ləğvinin dəqiq necə baş verəcəyini açıqlayıb. O, xüsusilə qeyd edib ki, ATƏT-in Daimi Şurası qurumun üzvlərinə bu məsələ ilə bağlı nazirlərin qərarını təsdiqləmək üçün “sakit şəkildə razılaşmağı” tövsiyə edib. Sentyabrın 1-dək qrupun buraxılmasına etiraz olmasa, qərar qəbul edilmiş sayılacaq.
"Nəzərə almaq lazımdır ki, bu qərarın icrası ilə bağlı inzibati və maliyyə tədbirlərinin həyata keçirilməsi bir neçə ay çəkəcək. ATƏT onları bu ilin dekabrından gec olmayaraq başa çatdırmağı gözləyir. Bundan sonra Dağlıq Qarabağ münaqişəsinin nizamlanmasının asanlaşdırılmasına cavabdeh olan hər üç struktur öz fəaliyyətini dayandırmalıdır", - Aleksandr Lukaşeviç vurğulayıb.
Xatırladaq ki, bir neçə həftə əvvəl Azərbaycan və Ermənistan Xarici İşlər nazirliklərinin rəhbərləri Ceyhun Bayramov və Ararat Mirzoyan ABŞ-da Minsk Qrupu ilə bağlı ATƏT-ə müraciət imzalayaraq quruma göndərmişdilər.
Almaz Həsənli
